ZHANGJIAJIE, China – Bishitantenan cu tabata spera pa cana riba e brug cu vloer di glas mas halto y largo di mundo, tin cu bay wanta.
E structura cu a kibra recort y cu ta colga riba e Gran Cañon di Zhangjiajie na China, a wordo cera diabierna, apenas 13 dia depsues cu el a habri pa publico dia 20 di Augustus.
“Nos a keda sorprendi pa e cantidad di bishitante,” un voceor di mercadeo y benta di e Gran Cañon di Zhangjiajie a bisa CNN, splicando cu e brug ta e principal atraccion di e luga.
El a agrega cu e capacidad di e brug di glas ta limita na 8000 bishitante pa dia, pero cu e demanta total tabata 10 biaha superior.
E famoso brug tambe a atrae interes na otro luganan den e zona.
Ora cu a puntr’e si e brug a haya kraak of a kibra, e voceor a bisa cu “no tabata tin problema.” Ademas el a confirma cu no tabata tin accidente.
E brug di seis meter di hancho tin un longitud di 430 meter riba un valle di 300 meter di profundidad entre dos sero den e impresionante Park Zhangjiajie, cu a inspira e paisahe pa e pelicula di ciencia ficcion, Avatar.
Gerencia a haci e anuncio diahuebs riba nan cuenta oficial riba Weibo, un site di microblogging di China.
No a informa ki ora esaki lo habri y a disculpa pa e inconvenientenan.
E comunicado difundi riba Weibo a bisa cu debi na “e urgencia di mehora y actualisa” e instalacionnan, Gobierno a dicidi ps suspende e operacionnan di dia 2 di September. Autoridadnan di e parke a sugeri pa dia 5 di September ta fecha di ciere, pa acomoda e agencianan di biahe cu “ya a inclui e Gran Cañon y e brug di glas den nan itinerario.”
Bishitantenan no ta contento
“Nan a reserva tur cos y awo nan ta bisa cu nan ta cera… Nan ta haciendo wega?” e XiaoMOMOYa a skirbi riba Weibo, como respuesta na e comunicado oficial.
E areanan escenico ta deficiente. Tin sushi tur caminda y no tin awa den boter na benta. Ta husto pa habri solamente depsues cu nan a haci e luga limpi,” otro usuario Fashiwanying, a skibri.
Durante e suspension, e Gran Cañon di Zhangjiajie tin planea pa mehora no solamente su infrastructura, incluyendo e parkinglotnan, sin e sistema di reserva ticket y servicio na cliente y otro aspectonan.
Haim Dotan, e firma arkitectonico Israeli cu a diseña e brug, no a responde na e solicitutd di declaracion cu CNN a haci.
Fuente: CNN en Español
