WASHINGTON D.C., Merca – E ex solda, Chelsea Manning, condena pa filtra documentonan clasifica riba e guera di Irak y Afganistan na e plataforma WikiLeaks, a wordo libera diaranson, 17 di Mei, un vocero di ehercito a confirma.
Manning, di 29 aña, a wordo condena na 2013 na 35 aña den un prizon militar pa 19 di e 21 cargonan presenta den su contra. En total el a cumpli casi 7 aña. E ta sali den libertad, danki na un conmutacion di pena cu e ex presidente, Barack Obama, a aproba, prome cu final di su mandato, DPA a indica.
Tempo cu ainda e tabata e solda Bradley Manning, e ex analista di inteligencia militar, a filtra na 2010 cientos di miles di documento riba e gueranan di Irak y Afganistan na e plataforma WikiLeaks den loke ta constitui e mayor caso di revelacion di secreto den e historia di Merca. E papelnan tabata contene hopi detaye cu lo a pone Merca den evidencia.
Durante e tempo cu el a pasa den e prizon den e base di Fort Leavenworth, den e estado di Kansas, Manning a somete su mes na un proceso di cambio di sexo. Segun varios informe, Manning a realisa welganan di hamber y hasta a purba di suicida varios biaha.
Fuente: http://www.eluniversal.com