Diahuebs ariba e pagina personal di Sr. Izaak van der Linden, un trahado di Arubus, el a pone un tipo di menasa riba su Facebook tanto pa e peatonnan como esunnan cu ta core bicicleta riba e caminda di Malmok. E expresion di cu peaton y ciclista mester hala pa e bus, of di otro modo, ta trapa ariba nan a causa masha indignacion den e comunidad di Aruba. El a cay den masha mal tera cerca hopi hende. Pa cu esaki nos redaccion di Masnoticia a tuma contacto cu Sr. Sannin Daou, Relacionista Publico di Arubus pa asina busca mas informacion y kico ta bay wordo haci pa loke ta trata e situacion aki.
Sr. Daou a splica cu Arubus ta comprometi cu e siguridad di tanto e usuarionan como e peatonnan. Ya caba a cuminsa traha ariba esaki, segun Sr. Daou.
Ta conoci cu Arubus no ta pasando den su miho momentonan y expresionnan haci ariba red social no ta un expresion normal, cu sigur no ta yuda na mehora e imagen cu e pueblo tin di e compania estatal di bus. E ta algo cu gerencia di Arubus lo mester averigua, kico ta e motibo pa cual Sr. van der Linden a haci e expresionnan aki.
Un biaha mas, Sr. Daou ta sigura cu tur hende por ta sigur cu Arubus ta trahando ariba e parti di siguridad di usuario y peatonnan, pa asina tin siguransa cu tur cos ta wordo resolvi.
Gerencia di Arubus a reuni diahuebs mainta ariba e tema aki, y a remarca cu ora di reunion prome cos cu nan ta haci ta pa reuni pa wak kico por wordo haci. Loke por wordo bisa ta cu parti di e chauffeurnan di bus, tin hopi ciclista, es decir hopi di nos ta esunnan cu ta uza e camindanan, hunto cu e ‘langzaam verkeer’. Esaki pa nan mes ta algo preocupante.
Di parti di Arubus, nan ta enfatisa cu nan sa cu e situacion a trece un preocupacion grandi pero nan ta trahando ariba esaki. E caso ta bou di investigacion y ora cu e investigacion keda cla, nan lo bin dilanti y duna tambe kico tur lo wordo haci pa esaki. Te asina leu tabata declaracionnan di Sr. Sannin Daou, Relacionista Publico di Arubus.