Diaranson mainta riba e caminda di Santa cruz net na altura di cede di Mep, a keda registra un accidente unda un Hyundai Tucson no a regula su velocidad ni tampoco su distancia cu consecuencia a bai dal tras di un takelwagen.
Mesora Unidad policial a presenta na e sitio y na yegada di polis a constata cu tin un señora herida y tambe tin mucha envolvi den e accidente. Mesora a notifica centro di alarma 911 pa asina despacha unidad di ambulance. Na e sitio di accidente a yega 2 unidad di ambulance unda a brinda asistencia medico na e chauffeur di Hyundai Tucson y tambe e muchanan. Paramediconan a stabilisa e señora y despues a transporte pa hospital pa asina haya tratamento medico avansa. Polis di trafico tambe a presenta na e sitio y a tuma dato di e accidente aki.