Diasabra marduga polis bezig cu patruya a duna un Toyota Starlet berde un señal pa para na altura di Peking na Santa Cruz E Starlet a nenga e señal di polis y a cuminsa trot bay direccion abou pa Piedra Plat.
Aki un persecucion a cuminsa y e Starlet cu velocidad hopi halto a sigui bay abow y na altura di Bright Bakery ta pasa ranca tur e baricada nan mei-mei di caminda y sigui pasa riba e sero di santo subi asera y coy direccion zuid pa bay Hooiberg.
Den e birada skerpi bandi Dennis Bar e chauffeur di e Starlet ta perde control y bay dal duro den un palo di lus y door di e impacto e auto a spin para cara panort. E impacto tawata hopi fuerte. Di biaha polis a solicita ambulance pa e dos ocupantenan.
Polis di trafico tambe a presenta na e sitio pa tuma datos. Ora polis a puntra e hoben pa ki e la core pa polis y hinca bida di e mes y su pareha den peliger e la contesta cu e no tin su papelnan na ordo y p’esey e no kier a para.
E dama pasahero tawata levemente herida pero sigur mirando e impacto e por a ricibi golpinan hopi mas fuerte pa culpa di un homber terco cu no kier a para pa polis.
Polis a tuma e auto den beslag. Personanan cu tawata pafo na e bar na Piedra Plat a conta cu e Starlet a pasa riba un velocidad masha halto mes sigui bay abow.