Diadomingo atardi a sosode un accidente basta fuerte riba e caminda di Paradera net dilanti Great Rich. Un Volkswagen Crossfox shinishi coriendo hopi iresponsabel baiendo direccion pariba y pasando auto pa loco diripiente ta topa cu trafico contrario y ta core drenta su banda bek pero ta dal hopi duro tras di un Hyundai Accent blauw.
E chauffeur di e Volkswagen a reverse y bandona e sitio. Polis y ambulans a bay na e sitio ya cu e dama chauffeur den e Accent a keda herida. E impacto tawata asina duro cu e number di e Volkswagen a keda graba den e bumper di e Accent.
Tambe tawata tin hopi testigo cu a coy number y marca di auto y asina duna polis. Polis a tuma dato y personal di ambulans a atende cu e herido. Daño material ta hopi. Pero durante cu polisnan ta bezig na e sitio a drenta un informe cu un auto lo a drenta un cura di cas y plama riba 2 auto para den cura na Marawiel. Mesora ta dirigi otro patruya pa e sitio.
Na yegada di e patruya ta constata cu un Volkswagen Crossfox shinishi biniendo cu velocidad hopi halto ta perde control den e bocht dal den baranca y bay halto pa despues bai pega den 2 auto staciona den cura. Un Ford Escape blauw y un Hyundai H-1 blanco.
Controlando e number di auto a resulta cu ta e mesun auto envolvi un rato prome na Great Rich. Pero e chauffeur mes a bandona e sitio na pia y pia abou. E patruya di trafico a presenta eynan tambe pa tuma dato. Polis a tuma e Volkswagen den beslag pa mas investigacion. Personal di WEB tambe a presenta pa drecha un meter di awa cu a keda kibra. Mas pariba personanan a spot e chauffeur y varios patruya a presenta pa purba gara e chauffeur pero e buskeda tawata envano.
Mas laat den atardi nan a bolbe spot e chauffeur den vecindario di e chines na Babijn y e biaha ki si polisnan a logra pone man riba e chauffeur A bay warda di polis cune pa midi alcohol den su curpa y tabata positivo na alcohol.