Diasabra anochi Editorial Charuba a honra Greg Peterson cu presentacion oficial di su buki Aruba Bird Wildlife na San Nicolas.
Aki a tuma lugar un evento masha special cu musica di Lee Connir cu su steelband, un quinteto di Mo Mohammed y Mishushu Mohammed riba drum y tambu, un steltloper profesional, Inkerman de Freitas acompaña pa e hobencita, yiu di Nicole Godett, Naya Whitfield.
Fuera di Alice van Romondt, kende a hiba palabra den nomber di Editorial Charuba y Prins Bernhard Cultuurfonds, tambe dr Gorgoza y Nathalie Silva, directora di Parke Nacional, a felicita Greg Peterson, Annette Petron- Bredie y Albert Peterson cu e tremendo buki di parha di Aruba.
Un joya di un publicacion cu ta conta cu no menos cu 450 pagina, full na color.
E ta e resultado di 8 aña di trabou di Greg Peterson y su ruman Albert tambe.
Den registro den 4 idioma inclui.
Manera Alice van Romondt a bisa: e buki aki merece un luga hopi special den cada hogar na Aruba!
Minister Hooyboer a anuncia cu cada scol lo haya un ehemplar for di ministerio di Enseñansa.
E buki excepcional aki ta obtenibel na Bruna, Van Dorp y Plaza Bookshop.
Un palabra di gratitud ta bay pa Galeria Artisa y su director Tito Bolivar, kendenan a percura pa un anochi inolvidabel. Un grupo grandi a disfruta di e ambiente nobo y unico na San Nicolas.
Un palabra di gratitud ta bay na Romar Trading, kende a percura pa e brindis, sin laga di remarca cu sr. Milton Harms y Greg Peterson ta amigo desde tempo di scol na Colegio Arubano.