A tuma morto di dos hobencito, Rishandroh y Eugene, cu a muri den e forma di mas cruel imaginabel, pa comunidad wak nan mes den spiel pa bisa “awo ta basta”! No mas! Den respuesta ariba e morto tragico di Rishandroh y Eugene den loke ta parce di ta abuso y negligencia, e Facultad di Ley y e Facultad di Ciencia y Arte di Universidad di Aruba (UA) a organisa un charla tocante Abuso y negligencia infantil den e aula di Universidad dia 12 di December ultimo.
E evento a start cu e introduccion di parti di e Rector di Universidad di Aruba, mr. Glenn Thode. Sr. Thode a anuncia cu Universidad di Aruba mester cumpli cu su rol den sociedad pa sigura cu un debate academico riba e tipo di problemanan por tuma luga. Consecuentemente, tres orador a duna e audienca un descripcion general y up to date di maltrato for di un perspectiva social, saludabel y legal.
E prome orador tabata Sra. Enid de Kort, cu ta un systeem therapeut den e seccion Bida & Famia na e Departamento di Asuntonan Social. E di dos orador tabata Sra. drs. Louise Rafael- Croes, cu ta un pediatra na Dr. Horacio Oduber Hospital. Y e di tres orador tabata mr. Frans Deutekom (L.L.M.) kende ta abogado general na Ministerio Publico.
Cada orador a conclui e presentacion cu dos recomendacion, contestando preguntanan di kico por wordo haci pa preveni e tipo di maltratonan aki di bolbe pasa y con tur e profesionalnan envolvi por coopera ariba e prevencion di abuso y negligencia infantil den futuro?
E anochi a sigui cu un dialogo entre e oradornan y e publico, bou guia di e moderador di Universidad di Aruba, mr. Eric
Mijts. Durante e parti di e anochi aki, tabata e intencion pa trece profesionalnan trahando ariba diferente parti tereno di proteccion infantil, pa un combinacion di ideanan pa bin cu recomendacionnan pa prevencion, reduci incidentenan y pa promove e derecho humano y e bienestar di nos muchanan. Na final di e anochi, tur esunnan presente a participa den un momento di conmemoracion dor di scuchando un poema, treci dilanti pa un studiante di e Facultad di Ley, Sra. Jurney Tromp.
E lectura y dialogo riba Abuso y Negligencia Infantil tabata un éxito. Mas di 70 profesional di diferente organisacionnan, incluyendo Minister Lampe y miembronan di Parlamento, a participa den e evento. E oradornan a stimula preguntanan pa un dialogo vivaz, cu a continua ainda despues di e evento den un hardin di Universidad.
Universidad di Aruba ta spera cu den futuro lo por tin mas di tipo di cooperacionnan asina manera esaki cu tur e personanan envolvi
E evento a wordo organisa pa Sra. Miranda Gielen, LLM., Asistente di Profesior den Ley Civil (Burgerlijk Recht) y Ley Familiar en particular y Sra. dr. Ruth Bonnevalle, Profesor den Derecho Penal (Strafrechtelijk Wet).
l