Diasabra 27 di mei ultimo a tuma luga na Cede di MEP na Santa Cruz e charla ‘Amor Propio’ pa encurasha esnan cu a participa pa pone prioridad pa empodera y stima nan mes den tur loke cu nan haci den bida diario. Den un mundo asina druk y congestiona cu trabou, famia, actividadnan, nos ta desaroya descuido den e manera cu cu nos ta stima nos mes y hopi biaha esaki ta resulta den un auto-estima hopi abou.
Señora Jenny Croes, fundador di ‘Renew Woman Aruba’, oradora na e evento, a splica y recorda nos e maneranan cu nos por empodera nos mes pa stima nos mes cu hopi biaha nos ta lubida pa practica den nos bida diario. Señora Croes a elabora riba e puntonan; E sinificacion di amor; E importancia di amor; Stima mi mes; Ken mi ta y; Siña otronan stima mi.
E evento a wordo bon atendi y tur presente a keda hopi satisfecho y a expresa e deseo pa Partido MEP continua cu charlanan asina importante. E siguiente charla ya caba ta wordo plania y lo tuma luga na september proximo.
Lider di MEP, señora Evelyn Wever-Croes, a gradici y felicita e damanan cu a organisa e charla, señora Shannon Henriquez y señora Darlaine Guedez-Erasmus y henter e team nan tras cu a haci e evento uno exitoso. Lider di MEP for di awo caba ta extende invitacion na pueblo di Aruba en general pa e siguiente charla interesante cu lo tuma luga na September. Fecha y topico lo wordo anuncia despues.
