Tres adulto mayor fayeci tabata causa di e candela cu a tuma luga diadomingo den e residencia di anciano Juan XXIII, ubica den e localidad di Aravaca, den e ciudad Spaño di Madrid.
Causa di e candela por tabata un charger di celular den mal estado cu tabata geplug den e camber caminda cu e vlamnan a cuminsa. Tabata trata di cuater di e tres residentenan, dos di cual, Lucia y Isabel, di 90 y 93 aña respectivamente, tabata entre e victimanan mortal.
E di tres morto, esun di un muhe di 65 aña, a tuma luga dialuna mainta den Hospital La Paz, caminda cu el a wordo hiba den estado grave despues di a rescat’e for di e residencia, segun El Mundo. Otro 16 persona residente di e centro aki a wordo hospitalisa den estado leve.
Aunke e vlamnan a cuminsa den un camber, el a expande door di henter e edificio, cu n’e momento ey tabatin 38 anciano den dje di e 40 pa cual e tin capacidad.
Cuater polis municipal y dos nacional a bay n’e residentenan na prome luga, cu solamente por a saca algun di e habitantenan di e camber afecta.
Poco despues polis cientifico, Bombero di e Ayuntamiento, Samur, Cruz Cora y Summa, cu a paga e vlamnan y a atende tur e residentenan, a yega n’e luga di e echonan.
Alcalde di Madrid, Jose Luis Marinez-Almeida, a mustra ayera su “mas sentido pesame” p’e fayecidonan y su deseonan di recuperacion p’e heridonan.