E mahestuoso torneo Champ of the Champs patronisa pa HEINEKEN cu premionan obsekia pa Banco di Caribe a inicia dialuna ultimo riba veld di Dragon Hitters na Barcadera. Champ of the Champs den su di 11 edicion ta wordo dedica e aña aki na baluarte Bibiano Croes. Bibiano a inicia su carrera di softball na un edad hoben na aña 1972 cu ACI Braves porcierto hungando slingshot e tempo aya. Bibiano tabata outfielder y mas tanto tabata hunga centerfielder. Despues Jo Thiel (q.e.p.d) a lanta equipo di Los Leones. Bibiano a melita den e ekipo aki cual mas despues a bira Chuchubi maneha e tempo aya pa Mario Willems. Bibiano Croes a continua su carrera como Manager Player den Chuchubi cual despues a bira Honda. Den añanan 80 Honda ta cambia y ta bira Aruba Video Center unda Bibiano keto bay tabata fungi como manager player. Na aña 1991 Aruba Video center a bira Pueblo Supermarket y Bibiano a keda Manager y despues Coach di Pueblo. Cu e ekipo aki Bibiano a biaha tanto pa Canada, Corsou y Hulanda. Despues Pueblo a bira First National Bank cual ekipo tambe tabata exitoso bou di maneho di Bibiano Croes. Bibiano tabata tin e honor como Manager player tanto di tempo di Chuchubi a titula campeon y promove pa AA y despues cu Aruba Video Center, Pueblo y First National Bank a conkista titulo nan di campeon di Aruba den e nivel mas halto di softball esta AA. SV Royal Power auspicia pa Aruba Softball Bond merecidamente ta dedica e torneo Champ of the Champs 2017 na honor di Bibiano Croes kende a dedica alrededor 30 aña di su bida na e deporte di softball. Danki Bibiano pa bo aporte na nos deporte.