Siman pasa Grand Master Sir Chaco Jose Cornelio a duna curso di arbitro y training di defensa propio na un grupo special di polis na Ecuador.
Durante e dianan 10 pa 13 di Februari, Grand Master Sir Chaco Jose Cornelio a duna curso di arbitro na e refereenan nacional di Ecuador. Un grupo grandi di referee nacional for di diferente parti di Ecuador a sigui e curso di arbitro aki pa nan siña e reglamentonan nobo di World Taekwondo Federation. Entrante di dia 1 di Januari 2017, World Taekwondo Federation a introduci reglamentonan nobo di combate. Ecuador no kier keda atras y a acerca Grand Master Sir Chaco Jose Cornelio pa duna un curso di 3 dia cu a culmina na examen di practica y teoria. Un total di 30 referee nacional a participa na e curso aki.
Mirando e experticio di Grand Master Sir Chaco Jose Cornelio tambe ariba e tereno di defensa propio, e grupo special di polis di Ecuador a acerca Grand Master Chaco Jose Cornelio pa un training di defensa propio. E training aki a bay bon y a cay na agrado di tur e participantenan ya cu tur e tecnicanan cu nan a haya for di Grand Master Chaco Jose Cornelio tabata diferente y di nivel hopi halto.
Noord Taekwondo Center ta felicita Grand Master Sir Chaco Jose Cornelio cu su prestacion na Ecuador, ya cu semper e ta hiba e nomber di Aruba pa dilanti den exterior.