Cft: “Mester mas progreso den e casonan pendiente pa basta tempo y e proyecto di presupuesto di 2020”

Colegio di supervision financiero (Cft) ta bolbe reitera cu Sint Maarten mester progresa mas den un serie di cuestion pendiente, manera e reformanan di pensioen, reduccion di e gastonan di cuido y reforma di servicio di impuesto. A pesar di e situacion politico actual, Colegio ta sigui insisti cerca Sint Maarten pa haci tur lo posibel pa tuma e stapnan necesario y pa cuminsa e aña presupuestario 2020 cu un presupuesto aproba.

Proyecto di presupuesto di 2020 y ehecucion di 2019
E proyecto di presupuesto di 2020 ta sigui presenta un deficit di 24 miyon florin. Pa tal motibo, aprobacion di Conseho di Ministro di Reino ta keda un rekisito a base di articulo 25 di e Ley di consenso di Reino tocante supervision financiero. E articulo aki ta permiti Pais Sint Maarten desvia di e regla di balans presupuestario den circunstancia extraordinario, manera e consecuencianan di e horcannan Irma y Maria. Cft ta recomenda pa reduci e gastonan di 2020 na un nivel mas realistico. Tambe Cft ta conseha Sint Maarten pa cuminsa aña presupuestario 2020 cu un presupuesto aproba.

Relaciona cu ehecucion di e presupuesto di 2019 Sint Maarten ta spera di termina e aña cu un deficit di 41 miyon florin, locual ta resulta mas abou cu loke a presupuesta (71 miyon florin). Encuanto e posicion di likides, e di dos reportahe trimestral di 2019 ta mustra un suma di 84,8 miyon florin na likides. Pa por bin na consideracion pa yudansa di likides Sint Maarten lo mester cumpli tambe cu cierto condicion cu e no a cumpli cu nan ainda, manera aumento di e edad cu derecho riba pensioen di e empleadonan publico di 62 pa 65 aña, incluyendo e transicion di un sistema di pensioen basa riba salario final pa un sistema di pensioen basa riba salario medio y reduccion di e salarionan di e miembronan di Parlamento.

Cft a compronde tambe cu ainda no a firma e acuerdonan di financiacion cu Fondo Fiduciario y cu EIB pa reconstruccion di e aeropuerto y ta enfatisa un biaha mas importancia di rehabilitacion di e aeropuerto pa garantisa y sigui mehora e perspectivanan economico di Pais Sint Maarten.

Cosnan notabel
Cft ta spera di Sint Maarten cu den un futuro cercano e lo mester por alcansa e nivel presupuestario di prome cu Irma na 2016 y, por lo tanto, lo e mester ta capaz di cumpli cu e Ley di consenso di Reino tocante supervision financiero. Sin embargo, pa logra esey ta necesario pa ataca mas lihe posibel un serie di cuestion cu ta pendiente pa basta tempo caba. Mas na halto riba e lista aki ta aparece e reforma previsto di servicio di impuesto. Conseho di Ministro a aproba e plan aki na luna di april pasa, pero ainda no a cuminsa cu su ehecucion. Ta spera cu e reforma aki -spera pa tanto tempo- lo contribui na un aumento structural di e entradanan di gobierno. E entradanan adicional aki lo permiti Sint Maarten, entre otro, compensa e deficitnan actual y antiguo y reduci e atrasonan considerabel di pago. Te awor Sint Maarten a efectua algun pago y, den e contexto aki, recientemente tambe el a cera acuerdo cu Telem y SZV.

Otro cuestion pendiente ta mehoramento di e maneho financiero y reforma di e sistema di pensioen y di e sistema di cuido di salud. Cft ta pidi atencion special pa e reforma di e sistema di pensioen y di e sistema di cuido di salud, en bista di e consecuencianan negativo cu esaki por tin pa e presupuesto di gobierno, si no administra nan adecuadamente. A entrega e proyecto di legislacion pa revision di pensioen di empleado publico na Parlamento na october 2018, pero te ainda no a aprob’e. Ainda mester entrega na Parlamento e ley pa aumento di e edad di Pensioen di Behes di 62 pa 65 aña.

A menciona e falta di recurso actual como e causa principal pakico ainda no a ehecuta e plan di mehoramento di e maneho financiero. Esaki por ocasiona retraso pa e aña acorda di 2021, den cual Sint Maarten lo mester a ricibi un declaracion aprobatorio di accountant respecto e cuenta anual di e aña ey. Cft ta conseha Sint Maarten pa haci un esfuerso pa acelera ehecucion di e plan. Pa loke ta e cuentanan anual mas bieu, e cuenta anual di 2016 no a ricibi un dictamen positivo di accountant ni di Controlaria General di Sint Maarten. Sint Maarten tin intencion di contrata asistencia tecnico pa elabora e cuentanan anual di 2017 y 2018, ya cu esaki no a sosode ainda. Tambe Parlamento mester aproba ainda e cuentanan anual di 2015 y 2016.
Colegio di supervision financiero di Corsou y Sint Maarten a haci un bishita na Sint Maarten di dia 28 pa dia 30 di october y el a tene combersacion cu Gobernador, Ministro di Finansa, Conseho di Ministro, Comision di Finansa di Parlamento, e miembro di Comision Directivo Nacional pa Recuperacion di Sint Maarten, Oficina di Programa Nacional y Comision di Progreso y Conseho pa Mantencion di Ley.

Comments

comments