Willemstad – Corsou tin un bon punto di salida pa realisa surplus presupuestario plurianual, esaki ta door di, entre otro, e resultadonan importante di e proyecto pa aumenta entrada di impuesto. Despues di hopi aña di deficit presupuestario, Corsou mester duna prioridad absoluto na cambio pa alcansa surplus plurianual. Colegio di supervision financiero di Corsou y Sint Maarten (Cft) a urgi Gobierno di Corsou esey den e combersacionnan reciente. Corsou ta enfrenta e tarea importante di reduci e debe publico na un nivel prudente, mientras cu e riesgonan y e incertidumbrenan ta sigui mes halto. Esaki ta conta specialmente pa cuido di salud y seguridad social. Reforma structural y inversion pa stimula crecemento, combina cu maneho stricto di presupuesto plurianual, ta esencial pa pone finansa publico na ordo.
Na principio economia di Corsou a recupera rapidamente di e efectonan di e crisis di pandemia. Despues di e contraccion economico di 18,4 porciento na 2020, economia real di Corsou a crece cu 4,2 porciento na 2021 y cu 5,9 porciento na 2022, segun e calculacionnan di Banco Central di Corsou y Sint Maarten (CBCS). Na 2022 e producto interno bruto nominal a bolbe na su nivel di prome cu e pandemia. Pa e aña aki CBCS ta spera un crecemento economico real di 2,7 porciento, mientras cu ta premira cu e inflacion lo ta di 4,5 porciento.
Un periodo di añanan largo cu deficit presupuestario y crecemento di e debe publico a haci cu finansa publico di Corsou a empeora hopi. E debe publico di Corsou actualmente ta monta na ANG 4.300 miyon, pues, 79 porciento di e producto interno bruto. Corsou ta enfrenta e tarea importante di reduci e debe publico na un nivel prudente, di cubri e riesgonan paden y pafo di e presupuesto, y di pone sostenibilidad di finansa publico na ordo riba un base plurianual. Por lo tanto, realisacion di surplus presupuestario for di 2023 mester haya prioridad absoluto.
Presupuesto di 2023
Fin di aña pasa Parlamento di Corsou a aproba e presupuesto di 2023. Corsou ta presenta un presupuesto balansa den 2023 y 2024, sigui pa surplus presupuestario limita den 2025 y 2026. Cft a urgi Corsou pa realisa surplus presupuestario na 2023 caba y uza e surplusnan ey pa paga e debe publico parcialmente. Esey no ta un tarea imposibel, ya cu Corsou ta logrando bon resultado desde 2021 cu e proyecto di aumento di cumplimento fiscal y optimalisacion di implementacion di e sistema fiscal. Combina cu recorte di gasto di Gobierno y un maneho presupuestario stricto, Corsou por logra e cambio pa yega na un surplus presupuestario ya den 2023.
Cuido di salud y seguridad social
Pa frena e crecemento di gasto den seguridad social y cuido di salud, reforma ta necesario. Cft tin basta tempo ta señala incumplimento di e medidanan anuncia na 2021 pa e fondo fluctuante, y e riesgonan di esey pa e presupuesto di e pais. Corsou ta paga un contribucion anual di ANG 306 miyon na e fondonan social y ta obliga tambe pa compensa deficit di e fondo fluctuante. Cft a enfatisa cu Corsou no solamente mester tuma medida compensatorio na plaso corto pa evita deficit den e fondo fluctuante, sino tambe mester implementa reforma structuralmente pa evita deficit na plaso largo.
Cft tambe a expresa su preocupacion explicito pa e situacion financiero precario di Curaçao Medical Center y e tardamento di accion concreto. Cft a yega di pidi Corsou caba pa tuma medida di prevision pa esaki den e presupuesto.
Reforma y inversion
Reforma structural, manera inclui den e Pakete di medida (Landspakket), y inversion pa stimula crecemento ta fundamental pa fortalece e potencial di crecemento di Corsou y aumenta e resiliencia di economia. Cft a señala e nivel abou di inversion publico y a anima Corsou pa inclui plan di inversion specifico den e presupuesto, por ehempel riba tereno di infrastructura fisico, y ehecuta nan cu e diligencia debido. Corsou mester probecha na un forma maximo di e oportunidadnan cu e Pakete di medida (Landspakket) ta brinda pa implementa reforma pa fortalece structura. Esaki lo fortalece e posicion inicial y sostenibilidad di finansa publico.
Desde dia 1e. di februari 2023, Señora Lidewijde Ongering ta nombra como presidente di Colegio di supervision financiero di Corsou y Sint Maarten (Cft), Colegio di supervision financiero di Aruba (CAft) y Colegio di supervision financiero di Boneiro, Saba y Sint Eustatius (Cft). Cft, den su constelacion nobo, a bishita Corsou di dia 6 pa dia 8 di februari 2023 y a hiba combersacion cu Gobernador, Minister di Finansa, Minister di Salud, Medio Ambiente y Naturalesa, Conseho di Minister y Comision di Finansa di Parlamento. Cft a combersa tambe cu gerencia di Banco di Seguro Social (SVb), Inspeccion di Salud Publico, directiva di Curaçao Medical Center y e intendente (kwartiermaker) di e Grupo Directivo di Saneamento di e entidadnan di CMC (Regiegroep Sanering CMC-entiteiten).
