Tur e nuebe alumnonan di VWO-5 di Colegio Arubano, cu a haci e examen pa e Certificado Hulandes como Idioma Stranhero (CNaVT) na mei 2017, a gradua. Esey ta un bon noticia pa e alumnonan! E certificado ta implica cu e alumnonan tin e capacidad pa sigui un estudio na un scol superior of universidad na Hulanda of Vlaanderen, na unda Hulandes ta e idioma di instruccion. Colegio Arubano, un instituto reconoci pa CNaVT, ta sumamente orguyoso cu e resultado di e alumnonan.
E nuebe graduadonan, cu awo ta den examenklas VWO-6, ta: Naima van Schie, Brian Yunlong He, Anahi Constance Schreuders, Michelle Guillaume Ackermans, Denise Danielle Hodgson, Melinda Ruiz, Jayceline Charmaine Boekhoudt, Ileana Karishma Kock y Shanya Melissa Geerman.
Esaki tabata e prome biaha cu Colegio Arubano a laga un grupo di alumno participa na e examen. E resultado fantastico di e prome grupo ta un estimulo pa participa atrobe otro aña.