Departamento di Obra Publico ta informa pueblo di Aruba en general y specialmente nos automobilistanan cu ta haci uzo di e caminda di Ponton cu dia 1 di September, 2017 e caminda ta bay ta parcialmente cera pa asfaltamento.
E caminda cu ta bay asfalta ta di Ponton 69A (Istore) te cu Cocorobana 11.
Ruta alternativa lo keda indica cu baricada y borchinan di aviso y e orario di ceramento lo ta di 8’or di mainta pa 6’or di atardi.
Pa loke ta trabounan di innovacion di caya grandi, esaki lo cuminsa entrante dialuna 4 di September 2017.
E trabounan di innovacion di caya grandi lo encera drechamento di cierto coneccionnan bou tegels cu ta necesario pa instala WIFI den caya grandi y alabes instala un Sound System.
Trabounan lo cuminsa na cuminsamento di caya grandi, esta dilanti La Linda y despues move fase pa fase.
E orario ta bay ta di 8’or di mainta te cu 4’or di atardi y e trabounan lo tin duracion di 6 siman cu ta programa pa caba 13 di October 2017.
En conexion cu e trabounan menciona Departamento di Obra Publico ta haci un peticion na pueblo di Aruba y tur peaton y automobilista pa tene cuenta cu e cambionan den trafico y ta pidi pa tene cuenta cu posibel inconveniencianan y ta gradici pa e comprencion.