Tanto durante e momento di firma oficial di documentonan di traspaso, como tambe durante e conferencia di prensa posterior, CEO di Valero Energy Corporation, sr. Martin Parrish a mustra di ta sumamente satisfecho y tabatin solamente elogio, tanto pa e relacion cu Gobierno di Aruba, como tambe pa cu CITGO Petroleum Corporation como operador nobo di e refineria. Den su mesun palabranan: “Tin hopi pa ta positivo y mi ta kere cu tur hende mester ta positivo riba dje. E ta bay ta bon.”
Na prome luga a gradici e palabranan di Prome Minister Mike Eman reconociendo e aporte cu Valero, su operacion y entidadnan a nifica pa Aruba. E ehecutivo Mericano a recorda con el a yega nos isla pa prome biaha na 2004 y for di e tempo ey, ta solamente cosnan bon e tin pa bisa di, entre otro, Sr. Ray Buckley, como tambe Gobierno di Aruba.
“Den transcurso di añanan, Minister President semper tabata un hende cu por a acerca, razonabel, cu bon cabes pa negoshi y un bon curason. Nos ta aprecia tur esey,” asina Parrish a declara. Tambe a bisa cu e ta bay haya falta di e relacion di negoshi y cu personalmente e lo bay keda den contacto. Tambe a gradici Minister Mike de Meza y Richard Arends pa e trabou estupendo cu semper a desplega.
Tambe e CEO di Valero a ratifica e palabranan di Prome Minister Eman indicando cu en berdad esaki ta un bon dia pa Aruba. Parrish: “Ta bay dilanti awo; ta bay over di reapertura di refineria cu Gobierno di Aruba como doño. Esaki ta un bon fit.” Refiriendo na CITGO, e ta wak e operador nobo cu bon wowo mencionando cu nan ta un tremendo operador y ta spera cosnan bon di nan y entidadnan cu lo establece na Aruba. A finalisa bisando cu su compania ta contento di por a yega na e acuerdo aki y ta wak dilanti awo na finalisa tur asunto pendiente.