AHATA y su miembronan a habri 2021 cu hopi positivismo. Pero a haya un sla chikito ora cu Merca su departamento di salud a dicidi cu tur ciudadano bolbiendo Merca mester haci un PCR test. Esaki Chief Executive Officer di AHATA Tisa LaSorte a comenta den un entrevista.
Por a nota e consecuencia cu esaki a trece cu ne mesora, ya cu por a nota cu e reservacionnan a cuminsa baha. “E pandemia aki ta manera un rollercoaster. Ora cu mi ta kere cu cos ta bay bon, tin algo ta pasa atrobe. Y esey ta pasando atrobe.”
AHATA ta mira cu toch april ta bay bira un luna basta bon. E reservacionnan de
spues di Pasco Grandi tabata basta bon pero e expectativanan ta menos cu añanan anterior, comparando cu 2020. Pero a bini den luna di april e ola grandi pa cual tabata necesario medidanan pa controla plamamento di e virus. El a trece un cambio den e reservacionnan. “E turistanan aki ta prefera di no biaha debi na incertidumbre y debi na e reglanan mas estricto.”
Doñonan di trabou ta pone hopi enfasis pa mantene e reglanan, cu tin hende ta haya nan fastioso. Sinembargo, e eheutivo a bisa, ta importante pa mantene e reglanan pasobra “mas lihe nos pasa e temporada cu e virus ta plama, mas lihe nos por yega na un recuperacion cu por conta riba dje.”
“Mas lihe nos pasa e temporada cu e virus ta plama, mas lihe nos por yega na un recuperacion cu por conta riba dje.”
VACUNA
LaSorte a splica cu awo vacuna ta habri pa tu ciudadano. Pa cual ta encurasha tur hende pa registra, principalmente trahadonan di sector HORECA. Y ta recorda tambe cu a pesar cu a vacuna, mester sigui uza tapaboca y mantene reglanan di higiena.
Den hotelnan mester cu henter e situacion di pandemia, mester a adapta hopi cos, hasta e servicio. “E solo hecho cu ta duna servicio sin e acostumbrado sonrisa cu ta scondi tras di u tapaboca ya caba ta algo diferente. Tin trahadonan a cuminsa uza camisanan mas alegre pa duna un miho ambiente,” el a conta.
Importante awo ta con ta bay maneha e cantidad di turistanan cu ta bishita Aruba den tempo di pandemia.