E Captain’s Meeting lo bira dia 1 di Juli y esey ta dia cu e Centro di Pesca Hadicurari lo duna atencion na e piscadonan, ariba nan dia.
Ariba e dia aki, nan lo tin actividadnan manera custumber, manera un torneo di pesca, cu hopi premio. Segun Sr. Rosa, dia di e Captain’s Meeting, e piscado por inscribi. E suma pa inscribi no ta un suma grandi, pero esaki ta inclui e t-shirt y tambe facilidadnan. Asina tur hende por disfruta di un dia di piscado, cual ta un tradicion hopi fuerte na Aruba. Tur aña Dia di Piscado ta wordo celebra en grande y Centro di Pesca Hadicurari ta apoya esakinan, pa esaki tambe por sigui existi tambe.
Tin hopi interes pa piscamento y ta purba di practica piscamento como deporte. Centro di Pesca Hadicurari, ta purba di motiva esunnan cu ta pisca na Baranca como tambe esunnan crioyo, dus esunnan cu ta subi lama. Pero Centro di Pesca Hadicurari lamentablemente no tin nada di haber cu e parti comercial. Y esey tin su efecto positivo cun’e y aki ta proteha e lama pa bo piscamento, pero di otro banda, e generacion nobo no ta mira e interes pa e mundo di piscamento. Pero, segun Sr. Rosa, nan ta purba di sigui fomenta esaki, pa asina ey crea un dinamica pa e generacion nobo, por tin un atencion special pa e tradicion cu tin di haber cu piscamento.
Dia 1 di Juli lo tin e actividad na Centro di Pesca Hadicurari, for di 8 or te cu 10 or di anochi, lo tin e Captain’s Meeting, y dia 2 di Juli lo tin e actividad henter dia, te cu 6 or di atardi. Pero e piscadonan, si nan kier despues di e Captain’s Meeting, lo por subi lama caba, segun Sr. Clifford Rosa, di Centro di Pesca Hadicurari.