Aruba Lions Club su banda tipico, bao di e direccion di Lion Rubin Ponson a pone ambiente, diasabra ultimo na cas di Cuido na San Nicolas. E banda a presenta diferente pieza cu a pone tur nos grandinan y personal di e centro move. Lions nan a percura pa cos di bebe y di come y tambe a baila cu nos grandinan. E grandi nan no por a caba di gaba con bon nan a pasa y e musica a trece bunita recuerdo cerca nan y nan ta gradici Aruba Lions Club pe bunita gesto aki.
E actividad aki tabata den cuadro di e celebracion di Himno y Bandera y e banda a toca na tur 3 centro. Esta na Maristella, na Savaneta. Na Paviljoen, na Playa y na Cas di Cuido na San Nicolas. Di e forma aki tambe a termina cu e presentacion nan pa awo aki na centro nan.
Ta e intencion di e banda aki pa sigui duna mas presentacion nan pa e resto di e aña aki na otro instancianan tambe. Director di e banda, Lion Rubin Ponson kier a gradici tur integrante di e banda pa nan colaboracion y tambe ta gradici e centro nan pa a duna nan e permiso pa por deleita e grandi nan.
Aruba Lions Club kier manda un danki di curason na e sponsornan y demas lions nan cu a yuda realisa e proyecto aki.
