Tur cos ta cla pa e fin di siman aki, pa loke ta e eventonan cultural na Centro di Bario Brazil. Esaki ta priminti di ta uno grandi. Chico Harms, presidente di e Centro ta elabora mas ariba esaki.
E ta splica cu despues di un eleccion tremendo cu tabata tin e siman cu a caba, ta preparando pa esun cu ta calcula cu ta mas grandi, cual ta diasabra, dia 26 di Augustus. E preparacion tabata completo. Tin cu agrega cu e entusiasmo di tanto e trahadonan cu ta preparando pa e eleccion y tanto e candidatanan cu ta bay participa ta hopi grandi. Por ripara cu sigur sigur cu tin un eleccion, coronacion y un show tremendo diasabra.E eleccion mes ta cuminsa pa 8’or di anochi. Tin carchi obtenibel na Centro di Bario mes. Ta warda tur hende pasobra e lo bay bira un show tremendo.
Pa loke ta e show, Sr. Harma a bisa cu e candidatanan lo bay bin cu nan mensahe, storia y baile. Ta algo hopi bunita. A haya bon comentario di e ultimo eleccion, cual ta e chikitonan, pa ta un bon trabao. Ta calcula cu pa 12’or di mey anochi, e show lo ta cla. Centro di Bario Brazil lo bay tin mas evento. Despues di e eleccion, lo bay bin esun mas grandi, cual ta diabierna, dia 1 di September, caminda cu nan lo bay tin parada cu lanterna, saliendo pa 7’or di anochi y diadomingo, dia 3 di September, ta e parada folklorico cultural, cu ta sali pa 3’or di atardi.
E ta bay ta un fin di siman grandi pa e fin di luna aki. Esaki ta e di 7 aña. Tin cu bisa cu aña pa aña e ta creciendo y Harms ta conforme di loke ta pasando.
Segun Sr. Harms, poco poco e idea ta drentando cu por bin mas grupo. E biaha aki nan lo tin grupo nobo, pero mayoria di e gruponan, ta di Noord, Paradera, Santa Cruz, diferente bario. Tin caba, pero kier haci’e mas grandi. Kier envolvi Centronan di Bario tambe aden. Na Aruba Carnaval ta un cos masha grandi. Si en caso nan kier haci algo pa e temporada aki, Sr. Harms a splica cu esey ta algo sigur. Ta nan deseo. A purba den pasado, pero e no ta facil. Hopi hende cu a bin cu nan awor aki den cultura, nan ta bisa cu nan ta pasando hopi bon y no tabata sa con dushi nan ta pasa. Pesey un biaha cu yega na Brazil, ta bin pa keda. Dia pa dia, mas informacion lo wordo duna riba e parada cultural folkorico, cual lo tuma luga e siguiente fin di siman. For di awor caba, pa loke ta e eleccion diasabra, un palabra di exito na tur e candidatanan.