Centro di Bario Brazil algun luna pasa a reenforsa su directiva, pa traha riba e diferente plan cu tin riba mesa, na bienestar di e famia den bario. Intencion ta pa sigui organisa diferente e actividadnan social, cultural y deportivo. Por ehempel cu weganan den bario riba dianan nacional. Tambe sigui engrandece e Parada Folklor/Cultural, asina sigui trece bek e sentimento profundo di nos cultura di antes.
Otro actividad cu ta bay sigui engrandece ta e popular wega “Mens Erger Je Niet LIVE” cu ta wordo hunga durante henter aña den C.B.B. Hopi famia y coleganan ta topa otro den un forma alegre y intercambia durante di e wega.
Recientemente C.B.B a habri su propio Gym, unda un gran cantidad di miembro ta acudi pa entrena y keda den bon condición. Tur dialuna y diaranson 6:30pm tin les di Zumba y Soca Freestlye.
Den CBB tin les di cushinamento pa mucha. Intención ta tambe pa cuminsa Januari cu Agricultura pa mucha. Pronto tambe les di computer, weganan di volleyball y trefbal. Den CBB tin mesanan di Ping Pong cu ta wordo masha hopi usa. Tambe tin programa pa yuda esnan cu kier cana y core pa nan salud etc. E organisacionan deportivo manera Baseball y Futbol ta un tremendo aporte den bario, ya ta haciendo hopi na desaroyo di hoben y adulto.
E veld di yerba artificial ta wordo bon usa, pero actual mester drecha e lusnan solar cu no ta funciona optimal.
Centro di Bario Brazil a bishita tur school den bario.
E proyecto mas grandi cu C.B.B ta trahando algun tempo caba riba dje ta: pa conhuntamente cu schoolnan den bario stimula pa trece mas hoben hunto cu nan mayornan den Centro di Bario Brazil. Ya caba a haci un bishita na tur e schoolnan den bario, a papia cu cabesante di cada school pa conhuntamente organisa diferente actividad deportivo y social pa mayor y Yiunan.
Otro proyecto importante ta bay haci, ta un “Encuensta” (cu sosten di departamento Social)den bario pa haya mas información kico e habitantenan ta desea den bario.
Den e dianan binidero promer cu aña cambia ta bay tin diferente actividad di gran balor den Centro, manera:
15 Dec. Re-encuentro di trahadornan cu a yuda CBB,
17 Dec. Hadrey di Fama y Baluarte di bario.
27 Dec. Dande den Centro.
Esnan cu kier coopera cu Centro di Bario Brazil , por yama na tel 5846500 of 5946862.