Den e cuadro di renobacion y mantencion di nos facilidadnan deportivo riba nos isla, St. Fundacion Lotto pa Deporte y un di su partnernan strategico Aruba Sport Unie, a dicidi di uni pa asina duna un cara nobo na un accomodacion historico manera esun di Centro Deportivo Libertador Betico Croes. A pone un capa completamente nobo mientras e logo di Lotto y pronto esun di ASU cu porcierto lo ta celebrando nan di 65 aña di existencia pinta padilanti di e compleho ta ilustra e cooperacion mutuo cu ta existi entre e dos instacianan deportivo aki.
Segun presidente di St. Fundacion Lotto pa Deporte, Sr. Di Stefano Wernet RA e ta masha contento cu Lotto un bes mas ta yuda un di su partnernan strategico door di aporta den e caso aki na verf henter e edicifio di Centro Deportivo Libertador Betico Croes na Sta Cruz.
“Cu orguyo nos di St. Fundacion Lotto pa Deporte a cera un joint venture cu un di nos business partnernan den deporte cu ta Aruba Sport Unie unda a inicia cu un proyecto di verfmento y asina duna e accomodacion deportivo historico un facelift nobo. Esaki tabata un plan cu pa basta tempo tabata riba planificacion y awo hunto a pone cen pa haci e trabounan nesecario. E compleho aki ta uno cu ta wordo usa regularmente cu diferente actividadnan, e mantencion di e luganan aki ta costa hopi cen. Nos tin suficiente compleho deportivo na Aruba y nos mester uza nan mas y sigui mantene nan. Pero pa esaki bo mester tin cen y cada bes Lotto ta busca e moda financiero pa sigui aporta na deporte den su totalidad. Ta haci un apelacion ta tur esnan envolvi pa stimula nos atletanan pa sigui practica deporte y alabes haci bon uso di nos facilidadnan deportivo”, sr. Wernet a bisa.
Mester bisa cu Lotto awor ta ocupando nan mes cu un investigacion con pa haci bon uso cu “upgrading” di nos complehonan deportivo, un structura unda e direccion mester ta miho cu e ta actualmente. Mas despues lo planifica pa e mantenimiento pa e parti paden di e accomodacion.