Oficina Central di Estadistica (CBS) ta organisando un Censo Piloto cu lo cuminsa e siman aki dia 3 di october te cu 13 di october 2019. Esaki en conexion cu preparacionnan pa cu e Conteo General di Poblacion y Vivienda (Censo Aruba 2020) cu lo tuma lugar entre 1 di october te cu 10 di oktober 2020.
Manera ta conoci Censo 2020 lo ta completamente digital. Compara cu Censonan anterior, esaki kiermen cu lo tin cambio organisatorio importante. Pa motibo aki un Censo Piloto ta di sumo importancia.
Durante e Censo Piloto lo test e aspectonan di digitalisacion di Censo 2020, por ehempel: e cuestionario digital, e proceduranan digital cu lo wordo usa durante e periodo di conteo pa garantisa e calidad di e datonan colecta, e procesonan digital pa analisa e datonan obteni y tambe e metodonan digital cu lo wordo usa pa procesa e datonan y publica e informacion colecta.
Mescos cu pa Censo2020, durante e Censo Piloto Aruba lo wordo parti den 5 area: San Nicolas, Santa Cruz, Paradera, Oranjestad y Noord. Un total di 750 punto di adres lo wordo acerca den cada area.
Pa e Censo Piloto, un total di 75 persona lo fungi como encuestador y 15 como encuestador di reserva. Nan lo acerca un total di 4700 punto di adres. Un encuestador di CBS semper por indentifica su mes cu un badge cu e logo di Censo 2020 y e logo di CBS. E hogarnan cu lo wordo acerca lo wordo entrevista pa medio di un cuestionario digital riba un tablet. E topiconan cu ta inclui den e cuestionario ta relata na e vivienda, e hogar y e personanan den e hogar.
CBS kier a enfatisa cu e privacidad di cada persona ta garantisa pa ley (Statistiekverordening) durante e Censo Piloto como tambe e Censo 2020. Informacion cu ta wordo colecta ta wordo uza solamente pa produci estadisticanan agrega for di cual ningun persona of instancia por wordo identifica.
Tambe ta importante pa corda e comunidad di Aruba cu hogarnan escogi pa e Censo Piloto lo wordo conta tambe na Censo 2020. CBS ta depende grandemente riba e cooperacion di hogarnan na Aruba pa haci e Censo Piloto y e Censo 2020 un exito. Pesey e lema di e Censo ta: “Pasobra Aruba ta conta riba BO!
Si tin cualkier pregunta por haci esaki libremente na telefoon 524-7433 of via nos e-mail adresnan: [email protected] of [email protected]