Entrante Diadomingo, 1 November 2020 te cu 30 di November, Censo lo inicia cu nan segundo parti den nan operacion y bishita cas pa cas. Esaki ta e parti cu ta tuma encuestadornan den dienst – e biaha aki algun 300 – pa bishita hogarnan cu ainda no a completa cuestionario online, tres of cuater parti cu falta na Aruba. Na cumisamento ora tabata organisando esaki, a pensa di haci e conteo den 10 dia, pero debi na COVID no por tin hopi hende parew riba caya y mester monitoria varios cos manera estado di salud.
Cada siman dus lo tin mas o menos 300 riba veld bishitando hogarnan rond Aruba pa completa e encuesta.
Durante Censo Online, a conta den total 10, 105 hogar, esey tabata hogar rond henter Aruba, pero naturalmente falta hopi mas, pasobra a conta cu Aruba tin mas o menos 44, 000 hogar. A conta un total di 28, 844 persona cual ta tambe un cuarto parti di totalidad di e poblacion di Aruba. “Censo online tabata un exito. Nos si kier a haya un 30% pero nos a haya 25%, pero tog mirando cu na cumisamento el a bay un poco slow, nos a pensa nos no lo yega e cantidad aki.
Pero despues na e ultimo siman nos a haya un avalancha di hende cu a yena e cuestionario y a yama nos tambe”, segun sra. Desiree Helder, Director Suplente di Central Bureau Statistics [CBS]. Mane semper, na Aruba tur cos ta na ultimo momento. “A pidi pa extende e cuestionario Online pero nos mester a sera. E ta debi na e trabaonan cu nos tin di haci pa nos prepara pa e trabaonan pa e siguiente fase di e Censo”, segun sra. Helder.