E famoso cantante- actor Hulandes Marco Borsato a yega na Aruba recientemente, acompaña pa e igualmente famoso fotografo- periodista Raymond Rutting, pa captura Aruba su luganan y personalidadnan iconico. Esaki ta inclui imagennan di e isla su Carnaval, su bunita playanan y su hendenan, for di piscadonan simpel pa streanan cultural.
Borsato, kende a lanta na Italia, consistentemente ta un di e cantantenan mas exitoso na Hulanda, y asina mes su interes activo den gastronomia a haci cu el a crea un reputacion respeta entre chefnan y amantenan di cuminda.
Rutting, un foto- periodista mundialmente renombra, cu un interes den Naturalesa, Arte & Cultura, Biahe y e Medio Ambiente, ya caba a bishita Aruba aña pasa pa saca un serie di potret titula Caranan di Aruba. E coleccion eclectico di potret a wordo exhibi na Hulanda como parti di e celebracion historico di e isla su di 30 aniversario di e Status Aparte.
E idea pa combina e dos artistanan pa un otro exhibicion di potret a nace ora nan a dicidi pa colabora riba un biahe pa Aruba. E plan tabata pa Rutting conduci un klas maestro di fotografia, cu Borsato como e studiante/ apprentice, capturando momentonan special di e bida di nos isla.
Riba diasabra, e duo talentoso a bishita Gold Coast Villas, specificamente White Modern Cuisine Restaurant, y su propietario Chef Urvin Croes; nan a cushina hunto, a presenta e cuminda na un manera sumamente bunita riba e tayonan, y despues Borsato y Rutting a saca potretnan di e piesanan mahestral. E trio tambe a saca potretnan di e clubhouse y e bunita saliña cu ta rondona esaki.
Chef Urvin, Aruba su propio Chef Celebridad, a introduci White Modern Cuisine pa prome biaha na 2012. E Chef creativo y innovativo, naci na Aruba, a haya su entrenamento na Hulanda y na Italia, y a disfruta di un carera solido desde cu el a caba su scol culinario. El a gana un cantidad di premio gastronomico, incluyendo Aruba su Competencia di Iron Chef na 2013, y el a traha den establecimentonan di alta clase manera e Grand Hotel Karel V, na Utrecht, Hulanda, cual tin un strea di Michelin. Na su restaurant contemporaneo na Gold Coast Residence, e ta promove e harmonia entre cuminda y biña, balansando calidad y sabor, den nan forma mas puro, sosteni pa su casa Mary Ann, kende ta maneha e sala di come.
Riba combinacion di potretnan por aprecia mas di e bishita di Borsato – Rutting durante nan bishita exitoso na Gold Coast Residence y White Modern Cuisine.