Ministerio di Enseñansa y Departamento di Enseñansa ta invita tur docente y mayornan pa bishita e prome Carrousel di Enseñansa organisa na Aruba riba dialuna dia 10 di October for di 12’or di merdia pa 8’or di anochi. Durante di e evento aki, diferente instancia, fundacion y institucionnan di educacion ta uni pa ofrece un vloer di exhibicion cu boothnan cu ta comparti informacion varia y interesante pa cada educador y mayor. Entrada pa expo aki ta gratis.
Ademas lo tin diferente charla cortico riba diferente tema, y lo lansa varios proyecto nobo manera “Veilige Scholen pa enseñansa primario, “Smart School” y “Mobile Lab”. Tambe lo comparti e resultadonan di diferente investigacion y estudionan haci, incluyendo e resultadonan di un proyecto di termento (“bullying”) na scol. Entre e exhibidornan ta conta cu Cuerpo Policial, y Universidad di Aruba.
For di tereno di enseñansa superior, esta Universidad di Aruba lo ofrece informacion di e 10 diferente estudionan cu e institucion aki ta ofrece. Lo comparti informacion tocante di e proceso di registracion, inscripcion, gasto, studierooster, etc.
Charisse Hoen ta comenta cu ta importante pa tin un Carrousel di Enseñansa tur aña pa laga pueblo en general sa e posibilidad nan di estudio na Aruba – fulltime, part time y cursonan. “Estudio ta e manera pa nos pais progresa, y un pueblo bon informa lo por contribui na e desaroyo di e pais y e cada miembro di e comunidad personalmente,” e ta agrega.
Luna di Enseñansa ta un ocasion importante unda ta para keto na esunnan activo riba e tereno di educacion. “Mustra nan aprecio y honra nan. Mi ta contento pa wak no solamente e docentenan pero tambe tur staf y otronan trahando den enseñansa ta wordo honra. Ta ful un team ta tras di enseñansa y nos mester sigui mustra aprecio pa tur,” Hoen a expresa. Ta docente no ta facil; tin mester di un comunidad pa lanta y educa un mucha, y mester para keto pa honra nan y brinda pueblo e oportunidad pa cera conoci cu tur esunnan den enseñansa, Charisse Hoen a conclui bisando.
Di parti di Cuerpo Policial John Larmonie di e team di comunicacion, informacion y prevencion di crimen a subraya cu tin un link entre Cuerpo Policial y enseñansa cu ta bastante fuerte; comunidad hopi biaha no ta consciente di e relacion aki. Ademas cu polisnan ta atende situacionnan tenso na scolnan, nan ta pone ordo y controla rond di scolnan; tambe por ehempel polisnan di bario ta bay scolnan pa intermedia pa cu alumnonan, pero tambe den casonan unda cu un mayor of hoben ta bira agresivo cu un docente.
Den su area specifico di trabao, Larmonie ta yega durante di henter aña directamente den e klasnan, unda cu ta ofrece informacion tocante di arma, droga, violencia, formacion di gang, y otro topiconan di importancia pa yuda muchanan y hobennan tuma miho decisionnan den bida.
E consehonan cu Cuerpo Policial ta duna ta bin di un punto di bista hopi practico. Por ehempel, ta inclui informacion esencial encuanto di leynan, cual ta sumamente importante, como cu hobennan a haya nan mes den situacionnan unda cu nan ta kibrando ley y cu frecuencia nan ta haya sa hopi laat – ya ora nan ta den man di husticia – cu loke nan a haci de facto ta ilegal y tin castigonan mara na e infraccion.
Larmonie a splica cu por compara e informacion di e leynan cu e lesnan di trafico, unda cu ta avisa y educa e hobennan di chikito pa nan sa kico ta corecto y kico ta incorecto pa asina nan ta na haltura di e leynan y e consecuencianan di kico ta pasa si nan kibra ley. Un otro link cu Polis tin cu scolnan ta riba tereno di conseho na directivanan di scol encuanto di siguridad di tereno, Larmonie a agrega.
Cuerpo Policial ta considera un di e partnernan importante entre e “ketenpartners” di enseñansa, y hopi otro elemento cu a hunga un rol den e relacion aki. Den e presentacion dialuna merdia, Cuerpo Policial lo duna un splicacion amplio di nan relacion cu enseñansa.
E tema enseñansa ta uno cu ta amplio y no ta simpel pa aborda; tur hende sa den teoria cu enseñansa ta valioso, pero no a compronde con valioso e ta, John Larmonie a remarca. Mas atencion bo duna e topico, mas bo ta habri wowo den comunidad pa di berdad tur hende balora enseñansa mas, el a bisa, referiendo na e celebracion di Luna di Enseñansa.
Finalisando, Larmonie a splica cu si compara paisnan unda cu enseñansa ta na un luga hopi halto, manera Scandinavia, unda tin un cierto modelo di enseñansa, por observa y confirma cu e comunidadnan ta mas sigur. Scandinavia ta un di e areanan mas sigur na mundo. El a agrega cu en bes di bay tras di modelonan, manera esun Mericano, unda cu tin mas polis, tin prizonnan mas grandi y ta militarisa, kisas mester enfoca riba modelonan cu ta mas exitoso.
Den futuro, mescos cu ta tumando luga den enseñansa, e team di prevencion di crimen ta desea di bin cu un “Crime Prevention Month” pa pone enfasis riba e importancia di prevencion.