Ya mundo ta celebrando Aña Nobo, faltando algun ora mas pa nos beurt yega. For di Sidney na Australia, te cu Pyongyang, na Nort Corea, enorme multitudnan a reuni, ta reuni y ta reuniendo pa bisa aña 2016 ayo, un aña marca door di tumultuoso eventonan global.
E Operahouse y e brug den e bahia di Sidney na Australia, tabata escenario di un enorme despliege di vuurwerk ta loke e ciudad Australiano a ricibi 2017.
Ta calcula cu a asisti por lo menos un 1.5 miyon di persona den e bahia pa observa e espectaculo.
E vuurwerk a rindi tributo na Prince y David Bowie, dos super estreya di e musica cu a muri den 2016.
11, 10, 9, 8…. Dicon e 31 di December aki bo mester warda un seconde mas pa ricibi e aña nobo.
Auckland, na New Zeeland tabata un di e prome ciudadnan di mundo cu a ricibi Aña Nobo. Eynan e celebracionnan a tuma luga den e Sky Tower den centro di e ciudad.
E despliege pirotecnico na Auckland a inclui 500 kilo di vuurwerk, un ton di ekipo y 10 kilometer di kabel.
Den e famoso cruce di Shibuya na Tokyo, Hapon, miles a reuni pa celebra e yegada di 2017.
Tambe miles a reuni pa celebra e aña nobo na Peking, China, cu un despliege mahestuoso di vuurwerk.
Na Singapore y varios otro ciudad Asiatico, tabata e promenan den ricibi 2017. Un di e celebracionnan mas vistuoso den e ultiom añanan ta esun di Dubai, den e Emiratonan Arabe. E aña aki, manera e ocasionnan anterios, vuurwerk a ilumina su edificionan enorme.
Tambe e shelo di e capital di Rusia, Moscu, tambe a iluma den e prome seconde di 2017.
Esaki a tuma luga despues cu e presidente Vladimir Putin a duna su discusro di inicio di aña.
Siguridad
Y hopi otro ciudad awo ta cla pa mira nan celebracion, mey mey di fuerte medidanan di siguridad, despues di atakenan na Berlin y Nice e aña aki.
Na London, cu ya tin algun ora caba den 2017, a aumenta vigilancia cu miles di polis desplega den e centro di e ciudad, unda cu a spera pa ricibi miles di persona cu a congrega pa e celebracion di Aña Nobo.
Na Paris, Madrid y New York, a establece bareranan di concreto y vehiculonan pisa pa cera e plazanan central unda cu e celebracionnan a y lo tuma luga.
Por ehempel na New York, tur cos ta cla pa e celebracionnan cu lo tuma luga riba Times Square awe nochi. Y aki na Aruba, nos tambe ta prepara pa ricibi 2017 cu hopi reto y speransa pa un miho aña.
Feliz 2017 pa tur hende.