Nos a celebra Dia di Tera aki na Santa Rosa den un forma masha grandioso. Cuminsando cu nos Mercado Santa Rosa for di mainta 9’or sigui te cu 3’or di atardi. Musica parti mainta tabata den man di sr. Nelson Sprok cu su Caha di Orgel. Musica di Dj a sigui despues. Mas den parti merdia manera custumber nos di Santa Rosa ta duna reconocimento na nos amigonan agricultor. E biaha aki no tabata un excepcion. Nos a scoge nuebe baluerte pa wordo reconoci. E nuebe baluarte nan aki ta den persona di sr. Jacobo “Cobi” Croeze. Un persona cu for di edad relativamente jong a cuminsa planta hunto cu su tabata. Nan semper tabata planta cunucunan grandi di Pinda. Semper nan a keda mantene e tradicion aki. Awendia “Cobi” a keda mante y gustumber y tradicion aki di planta Pinda. “Cobi” ta bin for di e bario di Santa Cruz pa ta exacto for di Macuarima unda ainda e ta plantando pinda y algun otro fruta cu berdura.
Sr. Aurelio Ruiz un persona bon conoci cerca nos. Awendia sr. Ruiz ta disponi di su propio negoshi. Esaki ta haciendo cu e produccion di e tan afamado Pica di Papaya cubo ta haya obtenibel den tur supermarket na Aruba. Sr. Aurelio Ruiz ta producuendo e pica aki for di varios aña caba. For di cuminsamento tur ingrediente tabata wordo cumpra. Awendia sr. Aurelio Ruiz mes ta planta tur ingrediente cu e ta uza pa produci su pica di papaya.
Sr. Sannin Daou tambe ta otro productor local cu tambe a wordo reconoci. Sr. Daou semper a practica esaki den forma di horticultura. Semper a solicita servicio di entrega di awa di parti di Santa Rosa.
Un otro persona cu tambe nos ta masha aprecio mirando e trabounan cu e ta haciendo cu diferente alumno dunando les di agricultura ta Sr. Agustin Lopez Perreira. Semper haciendo locual mas e ta gusta yudando alumnonan di tanto EPB y awor SPO Sta. Cruz den les di agricultura. Procedente di Venezuela y pa varios aña biba na Aruba. No solamente ta duna les pero tambe tin su hobby di planta pinda.
Otro docente cu tambe ta a wordo reconoci ta Sr. Rodolph Fingal cu tambe ta dunando les na e muchanan di SPO Sta. Cruz. Na varios ocasion ta duna conseho na Santa Rosa riba un of otro proyecto manera un di nan cu ta Aquaponics.
Sr. Cecelio “Chio” Ras cu por cierto ta un ex colega di Santa Rosa pero awor disfrutando di su merecido pension. Un persona cu semper a den Cria di Bestia. For di edad hoben tambe hunto cu su tata nan tabata cria Cabrito y tambe planta cunuco. Ken no ta corda Feliz Ras (dfm) di Santa Cruz pariba. Criadonan di bestia pa varios decada y te ainda “Chio” tin algun bestia ta cria.
E unico dama cu a wordo reconoci ta sRa. Sandra Kelkboom super bon conoci pa su pasabocanan vegetariano y conoci bou di e nomber “Dabaru”. Semper nan ta duna aporte na nos Mercado Santa Rosa. Pa varios aña presente durante di nos mercado. Tur producto traha dor di nan mes.
Sr. Gregorio Wolff ta otro di esunnan cu a wordo reconoci como un baluarte y sigur bon “Amigo di Santa Rosa”. Sr. Wolff tambe ta planta y tin algun cria y ta haciendo esaki cu hopi placer.
Pa ultimo nos a reconoci un “Rookie” cu no tin mucho tempo ta practicando agricultura. cu ta Sr. James Ocalia di “Goshen” cu tin su tereno na Alto Vista. Awor apenas e tin algun tempo eherciendo esaki pero logrando hopi den tempo corto.
For di man di minister encarga cu sector primario Sr. Chris Romero tur esunnan reconoci a ricibi nan certificado pa despues tur esunnan presente por a gosa riba musica di Grupo di Betico.
Manera semper nos productornan local ta duna sosten total na nos mercado y sigur na nos bishitantenan ofreciendo nan productonan fresco traha pa nos mesun hendenan.
Un palabra di gratitud y felicitacion na tur nos “Amigonan di Santa Rosa’ di parti di Santa Rosa y tambe minister Sr. Chirs Romero. Nos ta spera di por sigui conta cu e mesun excelente sosten na Agricultura y Cria y sin laga afo nos Mercado Santa Rosa.