Sinterklaas ta un celebracion cu ya pa 62 aña caba ta ser celebra aki na Aruba. Antes tabata e fudacion ‘Van Het Kind Voor Het Kind’ di sra. Wekker d.f.m. cu tabata encarga cu esaki. Tabata na 2008-2009 como comision presidi pa sra. Evelyn Frank y Fernando Frank d.f.m., miembronan Dejanira Janssen-Frank y Mireya Willems, kendenan a sigui cu e celebracion di yegada di Sinterklaas.
Na 2010 e comision aki a bira Fundacion Sinterklaas presidi pa sra. Evelyn Frank cu a tuma e organisacion di e celebracion di yegada di Sinterklaas over te cu awe. Un celebracion cu ta un fiesta nacional.
E Comision Celebracion Dianan Nacional (CCDN) cu ta cay bou di Departamento di Cultura Aruba (DCA) y Ministerio di Cultura ta yuda cu e parti facilitario y promocion di e evento aki.
Departamento di Cultura Aruba ta apoya e celebracion aki di Sinterklaas, como cu e ta un evento pa nos muchanan. Y caminda cu e muchanan ta ser stimula pa trata otro y siña aprecia otro.
Den nos cultura nos conoce e cordialidad pa cu otro como persona, cual cu no mester bay perdi. Nos como comunidad mester stimula y yuda promove e generosidad, cordialidad, sinceridad y aprecio pa otro bou di nos muchanan.
P.e. na Hulanda nan conoce e ‘pakjes avond’, caminda ta duna e ser humano den forma di poesia, ta skirbi poema y duna regalo na otro como muestra di aprecio pa otro.
Pakico pa mucha? Pasobra enseñansa riba e parti social-cultural eynan bo ta cuminsa educa y forma e muchanan. Di e manera aki ta siña e mucha aprecia e otro y nos cultura.
Den nos cultura Arubano e celebracion aki ta un medio pa stimula e mucha haci su best durante aña y asina e ta ser recompensa cu un bunita regalo.
Pa medio di esaki DCA ta trece dilanti cu riba e parti social-cultural ta promove den nos cultura y comunidad. Aki caminda union, alegria y nos bida social-cultural ta keda promovi, cultiva, mantene y cuida como e parti generoso di e Ser Humano.
DCA ta aplaudi e inciativa di Fundacion Sinterklaas, scolnan, institutonan y e hecho cu Kerekentenchi y SinterClub ta bini cu e Show Musical di ‘Si, Sinterklaas’ riba diamars 5 di december 2017 pa 6’or pm den Cas di Cultura.
Departamento di Cultura Aruba ta gradici actualmente Fundacion Sinterklaas, Kerekentenchi y SinterClub, Scolnan y Institutonan pa nan trabou di varios aña caba pa mantene e celebracion aki bibo.