Dia 13 di december Colegio San Augustin a celebra su 70 aña di existencia. Na e ocasión aki a duna homenahe na dos docente cu a labora na Colegio San Augustin y uno cu ta laborando ainda. Meneer Ho Sing Loy, Meneer Werleman y Jufrouw Peterson ta e tres docentenan cu a ricibi e homenahe. Esaki a encera cu algun facilidad di e scol a keda nombra na nan nomber. Durante e anochi a hiba palabra Directora di scol, A. Gunn, Directora di SKOA, sra. J. Daal, Prome Minister sra. E. Wever –Croes como tambe Minister di Enseñansa, sr. R. Lampe. Invitadonana gosa di e show di baile prepara pa e e alumnonan di ciclo avansa 1.
Tambe riba e anochi aki tabata tin presentacion di e klasnan di Ciclo Basico 1, caminda nan a duna muestra di loke ta e productonan cu nan a traha en conexion cu e materia di PV.
Ta yama danki nan tur colega cu a colabora pa haci e anochi aki uno exitoso y tambe na tur e comerciante, DOW, Brandweer cu a sa di extende nos nan colaboracion. Riba e pagina di Facebook por mira imagennan di e anochi aki. Celebracion di Pasco Colegio San Augustin
Dia 14 di december nos scol a celebra Pasco na scol mes. Mainta tur alumno a bay cu nan mentor den klas, djey tur alumno y docente a bay bou di ‘overdekte’ pa tende palabra di reflexion for di Pastoor Juancho.
Despues di e ceremonia a tuma luga e parti na unda a premia e alumnonan (ciclo basico y avanza) cu a resalta den e prome periodo, a enfoca riba prestacion, comportacion y colegialidad. Despues alumnonan a regresa na klas caminda tabata por a hunga weganan di mesa, como tambe playstation cu alumnonan mes a regla pa trece y haci competencia.
Pa 12.30 un grupo di hoben artista, entre cual e conocido Fredi Richardson (Rasta) a bin duna un presentacion y pone un ambiente bou di ‘overdekte’.
ARUBA DOET
Dia 9 y 10 di maart venidero nos scol lo ta participando na Aruba Doet. Pa e ocasion aki nos scol lo bay pone grafiti riba cierto murayanan di scol, pa asina haci e parti di e infrastructura aki mas atractivo pa nos alumnonan. Pa e motibo aki scol ta buscando boluntarionan pa duna nos un man riba e dos dianan aki. Tur mayor, famia y amigo ta mas cu bonbini, pa asina nos meta keda realisa. Pa registra como voluntario por inscribi riba e website www.arubadoet.com.
Carousel 2018
Dia 2 di ferbuari ultimo dos docente di Colegio San Augustin a prepara un carousel pa tur alumno di Ciclo basico 1,2 y ciclo avansa 1. Na e ocasion e alumnonan a ricibi informacionnan valioso di Cuerpo Policial, Cuerpo di Aduana y e K9 Maddy, FADA, Telefoon pa Hubentud, Aruba Aloë , Caiso y Soca Monarch, FEPO y Famia Plania. Ta gradici e dos docentenan pa a hinca e mainta aki den otro.
Jump Up Escolar
Dia 9 februari nos scol a participa pa prome biaha na e Jump up Escolar di e scolnan secundario di pariba di brug. Scolnan cu tambe a participa tabata: Filomena College,Ambraham de Veer y Colegio San Nicolas. Bandanan Tsunami y Le Groove a sa di pone tremendo ambiente riba e ruta di YMCA te Carnival Village. Nos alumnonan tabata bisti cu t-shirt geel y nan a haya awa, boli y chips durante parada. Nos tin cu bisa cu e alumnonan di tur scol pero particularmente esunnan di Colegio San Augustin a comporta tremendamente. Ta spera cu otro aña nos por participa un bes mas na esaki.
Opendag pa scolnan primario
Dia 13 di April venidero Colegio San Augustin lo habri su portanan pa alumnonan di klas 6 di scolnan primario resorta bou di SKOA. Scolnan cu lo bishita Colegio San Augustin ta Colegio Santa Famia, Colegio Sagrado Curazon, Colegio Cristo Rey, Colegio Santa Teresita, Colegio Santa Filomena, St. Michael School y St. Paulus School. Alumnonan di klas 6 lo bishita diferente klas e dia aki y asina haya un bista riba cada materia cu Colegio San Augustin tin di ofrece y tambe informacion valioso di nos scol.
Deporte na Colegio San Augustin
Colegio San Augustin ta participa na varios competencianan escolar. Dia 6 di februari nos scol a titula campeon na Volleyball Escolar. E titulo aki nos a sa di mantene pa dos aña consecutivo. Despues di e entregamento di medaya y copa, e alumnonan a haya un treat di scol na Urataka Center, caminda nan por a disfruta di dushi pizza y tambe algo pa refresca e garganta.
Alumnonan destacando riba tereno di deporte y musica.
Brian Howell di klas 3c a participa den luna di december na e ‘Caribbean Boxing Development Tournament’ na Saint Lucia y aki el a logra gana e medaya di oro. Hakeem Lowe di klas 3A otro atleta cu ta practica e deporte di Teakwondo a representa Aruba na dos ocasion, un biaha na Colombia y otro na Suriname y na tur dos evento el a logra medaya di oro. Dos alumno di Colegio San Augustin a keda corona como Reina di Calypso Hubenil y tambe Reina di Roadmarch infantil. Ta trata aki di Queen Lizy, Elize Jansen di klas 1B, Queen Lintje, Gerlien Heyliger di klas 4B.