E aña aki a planea no menos cu tres diferente evento pa celebra cu hubilarionan na Dr. Horacio E. Oduber Hospitaal. Recientemente un grupo grandi di trahadonan a celebra cu hunto nan tin un total di 280 aña trahando pa e fundacion. Tambe a tuma despedida di algun empleado cu ta bay disfruta di un pensioen bon mereci despues di te hasta a labora 45 aña na Hospital.
Charlaine Alexander-Huntington, encarga cu e departamento di Comunicacion y Informacion di Dr. Horacio E. Oduber Hospitaal a splica cu tin mas o menos 1000 empleado trahando cu e fundacion. Sin duda Hospital ta un di e organisacionnan mas grandi na Aruba y anualmente tin hopi empleado cu ta celebra cu a alcansa un cantidad di añanan den servicio. Tabata un dia hopi special pa Hospitaal, segun Alexander-Huntington mirando cu hopi compania na Aruba no tin gruponan asina grandi compliendo tanto aña di servicio. El a splica cu e profesionnan representa ta di tur departamento y algun te hasta cu bo ta haya na Hospital so manera enferermeronan specialisa y te hasta specialista cu ta traha y dedica henter su bida na pashentnan y Hospital.
Tabatin empleadonan cu a celebra 12,5 aña, 25 aña, 35 aña, 40 aña y hasta 45 aña di servicio incondicional, di lealtad y disciplina na Hospital.
Riba e dia special y bunita aki, empleadonan ta reflexiona y celebra hunto cu famia y coleganan riba e añanan cu a transcuri y riba e añanan cu ta keda nan ainda di servicio. A haci dedicacion special na nan y a saca potret hunto den un ambiente for di trabou.
E dedicacion y esfuersonan di tur e coleganan aki ta algo di aprecia, y sigur celebra hunto cu tur nos coleganan den un ambiente diferente y ameno, Charlaine Alexander-Huntington a conclui bisando. Pabien na tur cu a celebra y un palabra di danki na nos coleganan cu a baha cu pensioen.