E rol primordial di CEDEHM, ta pa yuda e hende muhe sali for di e bida cu nan ta hinca aden. Segun directora Sandra Brown, CEDEHM ta yuda e hende muhe cu upgrading via Enseñansa pa Empleo cu nan por haya mas entrada door di sigui curso y esey ta yuda nan pa nan por para un tiki miho den nan sapato si nan dicidi di sali for di un relacion caminda nan ta victima.
CEDEHM ta scucha e hende muhe na e Centro di desaroyo di Hende Muhe, pero no kier para keto cu e ta victima. Ban sigui move, ban dilanti y sali for di e circulo vicioso ey.
Brown a sigui splica cu na CEDEHM ta mira hende muhenan entre 24 pa 50 aña. Esey ta e grupo di mas grandi. Locual el a agrega ta cu esplicitamente cu ta hopi hende muhe Latino ta e victimanan cu ta bin y busca mas yudansa cu e hende muhenan local mes. Esey a tuma nota di dje.
E hende muhe local toch ta pasa den hopi cos, pero nan ta prefera di keda keto of no ta haci nada. No sa kico nan ta haci pasobra nan no ta yega. Por ta nan ta bay un otro instancia, pero mayoria biaha ora cu draai grupo di sosten, ta mira cu e hende muhe Latino ta esunnan cu ta sali pa purba sali for di e situacion toch.
Tin un slogan pa e aña aki cu ta “Be the Change”, sea e cambio cu bo kier mira. Si bo no tuma den bo man pa bo cambia bo situacion, otro hende no por haci’e pabo. Bay pe y busca e cambio eyfo, pero cuminsa na bo mes, Brown a finalisa.