E rol di Cede Aruba ta e mesun rol cu nan ta hungando pa e gruponan, caminda cu nan ta sostene e gruponan cu nan actividad. E gruponan hopi di nan ta topa un biaha pa siman, cual ta gruponan social cu boluntariamente ta bin hunto, cu ta organisa actividadnan, segun director di Cede Aruba, Daniel Tecklenborg. E por ta actividadnan hopi varia. E por ta gewoon un bingo, e por ta movecion, e por ta algo pa salud, e por ta cu nan ta haci un trip, e gruponan cu ta haya otro y nan a bira amistad y Cede Aruba ta yuda pa haci nan actividadnan. E gruponan ta haci hopi riba nan mes, recaudando fondo y Cede Aruba ta yuda un tiki extra pa logra cu nan meta.
Cede Aruba tabata tey presente na e reunion di Grupo Nucleo, pasobra nan ta sinti cu nan mester mas sosten, den organisa nan mes, den recauda fondo, den haya boluntario, den haya miembronan un tiki mas hoben pasobra edad ta subi y dado momeno ta bira vulnerabel pasobra no por haci tur cos bo mes mas.
Cede Aruba a trece algun idea kico por nifica pa e gruponan pero tambe kico nan por nifica pa nan mes, door cu no mester di underestimate 60 plussers. Ora cu ta cu pensioen, esey no ta nifica cu no por haci nada mas y nan por haci hopi y Cede Aruba ta kere cu nan tin e forsa pa organisa nan mes mas.
Tecklenborg a splica cu Cede Aruba kier haci un diferencia, por ehempel tin awor aki un programa cu ta na Savaneta y Lago Heights, cu ta dedica na un programa hopi mas activo, un programa di mas of menos 2 pa 3 dia pa siman, unda e gruponan por bin hunto. Cede Aruba por yega na fondonan afo pa financia programanan asina, pero ta bon pa stimula mas grupo asina aki pa nan lanta. E gruponan ta depende di e grandinan mes cu kier haci algo. Ta wak un gap hopi grandi pa e hombernan riba 60, pasobra ta wak cu tin mas tanto muhe. Pa e hende hombernan mester iniciativa nobo. Tecklenborg ta pensa riba cosnan practico, manera hende homber gusta traha algo, nan gusta move, haci algo activo y vooral nan no kier sinti cu nan ta grandi.
Ta depende hopi di iniciativa di comunidad tambe. Cu esaki por haci e yamada si tin hende grandi riba 60, hende homber cu kier haci algo cu otro hende hombernan grandi of mixto acerca Cede Aruba of acerca grupo Nucleo, cu ta un grupo di diferente grandinan activo, cu kier yuda e gruponan aki, cual direccion ta hopi bon. Mester bay den centronan di bario, mester bay den mas organisacionnan den bario cu por nifica algo pa nan, pero nan mester un man extra pa organisa nan mes y pesey Cede Aruba tey.