Sr. Daniel Tecklenborg, director di CEDE Aruba, a repasa e historia di Aruba Doet, en cuadro di e apertura oficial di e di cinco edicion di Aruba Doet.
El a splica cu Aruba Doet a cuminsa na 2013, cu un cantidad di 87 proyecto como accion boluntario mas grandi di Aruba. Y despues di 5 aña nos ta sumamente contento y orguyoso cu e aña aki a yega na 200 proyecto, cu lo tuma luga e weekend aki.
Tambe director di Cede Aruba a splica cu Aruba Doet no ta un proyecto cu por drecha e calidad di cuido y ayudo na Aruba. Aruba Doet ta un proyecto cu ta haci influencia hopi grandi ariba e circunstancia y omgeving di e clientenan y e personanan den e diferente organisacionnan.
Entre diabierna y diasabra lo drecha hopi facilidad. P.e. na SABA lo verf tur e camber di e clientenan, pa asina nan por tin un bida colorido rond di nan. Esaki lo tin su impacto grandi, pa hisa e calidad di bida di e clientenan di e organisacion. Henter e comunidad di Aruba lo duna un man. Tin mas di 3.500 boluntario cu durante dos dia di Aruba Doet lo traha.
Tambe Sr. Tecklenborg a splica cu Aruba Doet no ta para su so. E ta un proyecto riba nivel di Reino, ariba iniciativa di Oranjefonds, cu a crece bin Bonaire, Aruba, Corsou, Statia y St. Maarten. Esaki kiermen, cu e weekend aki lo tin mas di 10 mil proyecto cu lo wordo yuda.
El a gradici Oranjefonds, cu ta partner di Cede Aruba den esaki, cu ta haci posibel cu tur e proyectonan aki ta haya nan contribucion financiero, y tambe cu por organisa esaki akinan. Tambe kier organisa tur e organisacionnan, scolnan, clubnan di deporte, centronan di bario, organisacionnan, cu ta coopera cu Aruba Doet, cu ta kere den dje, cu ta hink’e den nan planning caba pa otro aña y ta crece hunto cu Aruba Doet. Un danki nan e partnernan comercial, cu ta yuda den fondo, yuda cu personal, of yuda cu medionan pa realisa e proyectonan. Tambe un danki na e team di Aruba Doet, specialmente Tyxel Wever y Marike Dijkman cu a traha duro pa logra e proyectonan, coleganan di CEDE.
Por ultimo director di CEDE Aruba, a gradici Su Excelencia Gobernador, Sr. Alfonso Boekhoudt cu a habri e di cinco edicion di Aruba Doet, na un manera simbolico.