Diahuebs dia 27 di maart 2025, Daniel Tecklenborg, Director di CEDE ARUBA, a haci bishita na Minister saliente Rocco Tjon di Asunto Social y Husticia, pa oficialmente presenta e evaluacion di programa BARiO UNiCO – un programa innovativo pa duna sosten y fortalece e Centro di Barionan (CBs) di Aruba den un manera structural y sostenibel.
E programa BARiO UNiCO e lansa na 2022 via un Memorandum of Understanding (MoU) entre Gobierno di Aruba, CEDE ARUBA y e centronan di bario, unda a crea un forma nobo di traha nobo pa desaroyo comunitario hunto cu comunidad.
Después di 1,5 den e programa, CEDE ARUBA a opta pa a hasi un evaluacion tocante e MoU pa obtene feedback di e centronan pa cu e forma di traha. E evaluacion a wordo realisa independientemente pa e compania Cornerstone Economics. E programa ta mustra progreso amplio, aliansa fuerte, y direccion positivo pa continua cu crecemiento.
Logronan di BARiO UNiCO
Mas bishita y participacion di comunidad
7 di 9 CB cu a participa den e evaluacion a reporta mas bishitantenan, orarionan mas largo, y mas visibilidad den nan bario. E personal nobo tin un rol esencial den revitalisa e centronan como espacio mas dinamico y inclusivo.
Aumento den fondo y recurso
Mas di AWG 1 miljoen den fondo adicional a wordo atrai, incluyendo subsidio y co-financiamento via Samenwerkende Fondsen Cariben, Fonds voor Cultuurparticipatie y Buurtfonds di Postcode Loterij.
Evaluacion positivo di Centro di Bario
Mayoria di centronan a duna un puntuacion entre 7 y 10, cu un promedio di 8 pa e sosten y maneho di CEDE ARUBA.
Retonan cu ta nifica oportunidadnan
E evaluacion a identifica algun area pa desaroyo, cu ta trece gran oportunidadnan pa sigui fortifica e impacto di BARiO UNiCO:
Potencial pa mas colaboracion cu trabou social
Varios CBnan ta sinti necesidad pa mas colaboracion cu trabou social y prevencion social pa asina por atende cu retonan social den e bario. Esaki ta exigi un manera nobo di traha mas integral den bario.
Desaroyo profesional pa e personal den e centronan
E personal nobo tin un contribucion positivo, pero tambe tin mas necesidad pa formacion den planning, comunicacion y coordinacion.
Mehoracion di acomodacion pa mas actividad
Hopi centronan a indica cu nan edificio mester di modernisacion. E segundo fase planifica di BARiO UNiCO ta inclui evaluacion profesional pa adapta e espacio na loke ta necesario den deporte, cultura, educacion (no formal) y recreacion. Esaki lo por wordo realisa hunto cu Gobierno, fondonan y sector priva.
Sosten Administrativo pa alivia e organisacion
Directivanan a indica un necesidad pa mas apoyo cu tareanan administrativo. CEDE ARUBA ta explora un sistema comparti cu administración separa pa cada centro. E ayudo aki lo yuda crea mas tempo y energia pa e programa den e centro y relacion cu comunidad.
Un bista pa futuro
Durante e presentacion, Daniel Tecklenborg a resalta e importancia di inverti den hende y luga: “BARiO UNiCO ta demostra cu e sosten na un bon manera ta yuda un centro di bario bira un lugar central den e bario cu un programa intergeneracional y intercultural. E evaluacion aki ta confirma e gran trabou cu ja ta tuma lugar y ta guia nos pa consolida un Aruba mas participativo y fuerte – bario pa bario.”
Minister saliente Rocco Tjon a responde cu optimismo: “E colaboracion entre gobierno, CEDE ARUBA, y nos centronan ta e tipo di inovacion social cu Aruba tin mester. E evaluacion ta duna un direccion cla y inspira.”
Siguiente paso: prioridadnan comparti
CEDE ARUBA ta gradici na Minister saliente Rocco Tjon y Gobierno saliente pa su confiansa den e colaboracion aki y cu a keda habri porta pa un co-creacion entre Gobierno, NGOs, fondonan internacional y sector priva. CEDE ARUBA tin tur confiansa cu e programa lo continua cu exito y cu sosten di Gobierno nobo.
E prioridadnan siguiente ta wordo enfatisa:
Promove mas colaboracion directo cu trabou social di NGOs y Gobierno
Conecta actividadnan di e centronan cu barionan mas isola
Amplia colaboracion cu mas fondo, sector priva y partnernan adicional
Inverti den espacionan di e centronan a base di nan e necesidadnan local.
