E CPI (Indice Consumo di Prijs) pa luna di April 2021 ta 97.57, loke ta representa un caida di 0.02% compara cu e indice di Maart 2021 (97.59) y acumulando un subida di 0.5% te cu na April di e aña aki.
E cambio di e CPI pa e ultimo diesdos (12) lunanan (April 2020 te cu April 2021) ta -0.4%, un subida di 0.5 punto di porcentahe (ppt) compara cu e periodo corespondiente di aña pasa (-0.9%).
E promedio anual di e tasa di inflacion pa e periodo di April 2020 te cu April 2021 ta -2.3%, un caida di 5.5 ppt compara cu e 3.2% registra den e periodo di April 2019 te cu April 2020.
Durante e luna aki, cinco (5) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Mobilario” (-2.6%) y “Recreacion y cultura” (-1.8%), causando un efecto di -0.24 y -0.18 ppt. E caidanan den e restante sectornan a contribui cu un efecto di -0.16 ppt riba e CPI di April 2021.
E caidanan aki a wordo contraresta parcialmente door di subida den e indice di e sectornan di “Transporte” (2.4%) y “Vivienda” (0.7) cu a contribui cu un efecto di respectivamente 0.31 y 0.17 ppt riba e CPI di April 2021.
E subidanan den e restante sectornan a contribui cu un efecto di 0.08 ppt riba e CPI di April 2021.
E caida den e sector di “Mobilario” a wordo causa door di principalmente un caida di 9.7% den e categoria “Aparato pa uzo domestico”, causando un efecto di -0.26 ppt. E caida den e sector di “Recreacion y cultura” a wordo causa principalmente door di un caida di 22.8% den e categoria “Ekipo audiovisual, fotografico y pa procesamento di informacion”, causando un efecto di -0.15 ppt.
E subida den e sector di “Transporte” a wordo causa door di principalmente un subida di 3.7% den e categoria “Gasto relaciona cu uzo di vehiculo di transporte personal”, causando un efecto di 0.28 ppt. E subida den e sector di “Vivienda” a wordo causa door di principalmente un subida di 3.0% den e categoria “Mantencion y reparacion di vivienda”, causando un efecto di 0.16 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu Maart 2021, 34.6% di e bienes y servicionan aki a conoce un aumento di prijs causando un efecto di 0.81 ppt, mientras cu 47.1% ta mustra un caida di prijs, cu a contribui cu un efecto di -0.83 ppt y pa e restante 18.4% no tawata tin cambio den prijs. Prijsnan di bienes a baha cu 0.03% y a causa un efecto di -0.02 ppt. Prijsnan di servicionan a conoce un caida leve di 0.01% y a causa un efecto insignificante riba CPI di April 2021.
Core inflation
E CPIC (core inflation) – CPI excluyendo e efecto di energia y cuminda – a registra na April 2021 un caida di 1.4%. E indice di energia – cu ta consisti di e productonan: electricidad, awa, gasolin y diesel a registra un caida di -6.1%. E indice di cuminda a registra un caida di 2.6%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na April 2021 ta Afl. 4,750, un caida di Afl. 71 compara cu April 2020 (Afl. 4.821). E bestaansminimum pa un hogar di un (1) adulto ta Afl. 2,262, un caida di Afl. 34 compara cu April 2020 (Afl. 2.296).
