Oficina Central di Estadistica (CBS) ta organisa den e periodo di 13 di October pa 15 di December 2016 un estudio bao di migrantenan y nan integracion na Aruba yama “Aruba Migration and Integration Survey (AMIS)”.
E meta di e estudio ta pa obtene informacion tocante caracteristicanan y moda di biba di migrantenan na Aruba.
Segun e ultimo conteo di poblacion (Censo) teni na September 2010, e poblacion di Aruba ta consisti di 92 diferente nacionalidad y ta bini di 133 diferente pais. Gruponan mas grandi di migrante ta bin di Sur America, Hulanda y Caribe pero tin gruponan tambe di paisnan manera China y Filipinas. Na e momentonan aki un tercera parti di e poblacion di Aruba a nace pafo di Aruba.
Grupo di estudio
E estudio lo dirigi su mes principalmente riba e grupo di migrante cu recientemente a yega Aruba. Esaki ta consisti di personanan cu a nace pafo di Aruba pero cu a bin biba na Aruba den e ultimo dies añanan. Tambe e miembronan di e famia di e migrante lo ser entrevista (independientemente si nan a nace na Aruba of no y cuanto tempo nan tin ta biba na Aruba).
E estudio lo trata diferente tema manera: caracteristicanan personal, historia di migracion, actividad economico, reclutamento y e situacion di bida na e momento di migracion, intencion, conocemento y opinion di migrante riba Aruba y e famia di e migrante.
Encuesta
Pa e estudio lo ser bishita 900 adres unda tin por lo menos un migrante cu recientemente a bin biba na Aruba. E adresnan cu lo wordo bishita a wordo scogi arbitrariamente y ta reparti over di henter Aruba.
E encuestador(a)nan di CBS por wordo reconoci mediante di un badge cu nan number, portret y e stempel di CBS. E informacion obteni lo wordo procesa di un manera completamente anonimo y lo wordo usa unicamente pa genera estadistica agrega. Despues di e investigacion e informacionnan recolecta lo ser procesa pa traha tabelnan estadistico y e resultadonan lo ser presenta na publico pa medio di un publicacion. Tur encuestador envolvi ta obliga pa ley di tene secreto tur dato confia na nan.
E cooperacion di comunidad ta di gran importancia pa haci e investigacion un exito. Di antemano nos kier a gradici pa e cooperacion duna na e investigacion aki.
Pa mas informacion por tuma contacto libremente cu Oficina Central di Estadistica na telefon 5247433 y puntra pa un miembro di e team di AMIS 2016 of via e-mail: [email protected]
Parti di e grupo di encuestadonan pa e AMIS 2016.
1