Pa medio di e comunicado aki Oficina Central di Estadistica (CBS) kier sigui informa e pueblo di Aruba tocante preparacionan pa cu e Conteo General di Poblacion y Vivienda cu ta planea pa tuma lugar di 1 pa 10 di oktober 2020 (Censo 2020).
Durante Censo 2020, tur hogar na Aruba lo wordo bishita pa un team di aproximadamente 1200 persona (tellers) cu lo ta encarga cu e tarea di colecta informacion riba topiconan manera vivienda, salud, educacion y labor. Un Censo ta un instrumento valioso pa henter Aruba. Instancianan publico, institutonan priva, scolnan y personanan individual por haci bon uso di e informacion colecta pa formula maneho, haci planificacion y tambe pa keda al tanto di desaroyonan importante cu ta regarda e poblacion di Aruba.
Pa garantisa cu e Censo 2020 lo ta un exito, CBS ta depende di henter e pueblo di Aruba y tambe di tellers cu lo asisti den e coleccion di datos cerca tur hogar na Aruba. E ta hopi importante pa esnan cu fungi como teller ta personanan confiabel y capacita pa haci e tarea importante cu nan tin nan dilanti durante di Censo 2020 na e mihor manera posibel.
Pa CBS por selecciona e personanan cu lo forma parti di e team di tellers pa Censo 2020, lo habri entrante dialuna 3 di juni proximo un formulario di inscripcion pa aplica pa ta teller durante di Censo 2020.
Formulario di inscripcion
Censo 2020 lo bay ta completamente digitaal y pa e motibo aki CBS a scohe pa haci e inscripcion tambe completamente digital. Esnan interesa pa fungi como tellers durante di Censo 2020 lo por acudi na e website di CBS www.cbs.aw y yena e formulario di inscripcion online. Via un link na banda drechi di e homescreen di e website por haya acceso na e formulario di inscripcion.
E rikisitonan mas importante pa esnan cu ta desea di aplica ta cu nan mester tin e edad minimo di 18 aña, un educacion minimo di MAVO, conocemento di traha cu un tablet y disponibilidad pa traha full time durante di e periodo di Censo 2020.
CBS tambe lo organisa un conteo di prueba durante e prome siman di oktober 2019 pa haci un chekeo general di tur e proceduranan cu lo wordo usa durante di Censo 2020. Pa e conteo di prueba aki, CBS lo mester di 75 tellers. Esnan interesa pa contribui na e conteo di prueba aki tambe por haci uso di e formulario di inscripcion online.
Pa mas informacion por tuma contacto libremente cu CBS durante orario di oficina na number di telefon: 583-7433 of via e-mail na: [email protected]