E CPI pa luna di October 2018 ta 122.02, loke ta representa un caida di 0.1% compara cu e indice di September 2018 (122.14) y acumulando un subida di 3.7% te cu na October di e aña aki. E cambio di e CPI pa e ultimo diesdos (12) lunanan (October 2017 te cu October 2018) ta 4.2%, un subida di 4.6 ppt compara cu e periodo corespondiente di aña pasa (-0.4%). E promedio anual di e tasa di inflacion pa e periodo di October 2017 te cu October 2018 ta 2.7%, un subida di 3.1 ppt compara cu e -0.4% registra den e periodo di October 2016 te cu October 2017. Durante e luna aki, cuatro (4) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Recreacion y cultura” (-3.3%) y “Mobilario” (-0.4%), causando un efecto di -0.28 y -0.02 ppt, respectivamente. E caida den e restante sectornan a contribui cu un efecto di 0.01 ppt riba e CPI di October 2018. E caidanan aki a wordo contraresta parcialmente door di principalmente subida den e indicenan di e sectornan di “Paña y sapato” (1.8%) y “Cuminda y bebida no-alcoholico” (0.6%), cu a contribui cu un efecto di 0.09 y 0.08 ppt riba e CPI di October 2018. E subidanan den e sectornan restante a contribui cu un efecto di 0.04 ppt riba e CPI di October 2018. E caida den e sector di “Recreacion y cultura” a wordo causa principalmente door di un caida den e categoria “Vacacion” (-35.0%), causando un efecto di -0.24 ppt. E caida den e sector di “Mobilario” a wordo causa principalmente door di un caida di 3.0% den e categoria “Aparato pa uso domestico”, causando un efecto di -0.02 ppt. E subida den e sector di “Paña y sapato” a wordo causa principalmente door di un subida den e categoria “Paña” (1.8%), causando un efecto di 0.08 ppt. E subida den e sector di “Cuminda y bebida no-alcoholico” a wordo causa principalmente door di subida di 0.6% den e categoria “Cuminda”, causando un efecto di 0.08 ppt. E canasta di consumo di e CPI ta consisti di 452 bienes y servicionan. Compara cu September 2018, 37.8% di e bienes y servicionan aki a conoce un aumento di prijs causando un efecto di 0.43 ppt, mientras cu 27.4% ta mustra un caida di prijs, cu a contribui cu un efecto di -0.53 ppt y pa e restante 34.7% no tawata tin cambio den prijs. Prijsnan di bienes a subi cu 0.3% na October 2018 y a causa un efecto di 0.16 ppt riba e CPI di October 2018. Prijsnan di servicionan a conoce un caida di 0.7% y a causa un efecto di -0.26 ppt. E CPIC (core inflation) – CPI excluyendo e efecto di energia y cuminda – a registra na October 2018 un subida di 2.0%, cu ta 1.7 ppt mas halto compara cu e periodo corespondiente di aña pasa (0.3%). E indice di energia – cu ta consisti di e productonan: electricidad, awa, gasolin y diesel a registra un subida di 2.9%, cu ta 7.0 ppt mas halto compara cu e periodo corespondiente di aña pasa (-4.1%). E indice di cuminda a registra un subida di 6.1%, cu ta 5.0 ppt mas halto compara cu e periodo corespondiente di aña pasa (1.1%). E bestaansminimum pa un hogar consistiendo di dos (2) adulto y dos (2) mucha (edad 0- 14 aña) na October 2018 ta Afl. 4,539, mientras cu pa un hogar di un (1) adulto e suma ta Afl. 2,161.
Cambio di prijs di petroleo, utilidad, gasolin y diesel na October 2018
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na October 2018 e prijs promedio pa bari di petroleo (US$ 71.44) a conoce un subida di US$ 1.29 (1.8%) compara cu September 2018 (US$ 70.15). E costo total di energia pa kWh pa un uso di electricidad te cu 500 kWh no a cambia na October 2018, el a keda Afl. 34.52 cent pa kWh. E costo total di energia pa kWh pa un uso di entre 501 – 1000 kWh no a cambia na October 2018, el a keda Afl. 35.72 cent pa kWh. Adicionalmente, e costo total di energia pa kWh pa un uso di electricidad riba 1000 kWh no a cambia na October 2018, el a keda Afl. 45.93 cent pa kWh. Prijs di electricidad y di awa no a cambia compara cu September 2018. Consecuentemente, e prijs promedio di electricidad pa vivienda a keda Afl. 265.65, mientras cu e prijs promedio di awa pa vivienda a keda Afl. 137.05. Prijs di gasolin a subi na October 2018 cu Afl. 0.50 cent (0.2%) y a causa un efecto di 0.01 ppt riba e CPI. Prijs di diesel a registra un subida di Afl. 5.10 cent (2.8%) na October 2018 y a causa un efecto di 0.01 ppt riba e CPI. October 2018, utilidad, gasolin y diesel como grupo, tawata tin un subida di prijs di 0.1% compara cu September 2018 y hunto a influencia e CPI cu 0.02 ppt, mientras cu e restante 448 bienes y servicio hunto a experencia un caida di prijs di 0.1% y tawata tin un efecto di -0.12 ppt riba e CPI.
Cambio di prijs di Cuminda y servicio di catering na October 2018
E indice di “Cuminda & servicio di catering” a registra un subida di 0.4% na October 2018, despues di un subida di 0.2% na September 2018. E indice di “Cuminda na cas” (0.6%) a registra un subida, unda nuebe (9) di e diesun (11) indicenan di e gruponan di cuminda na cas a subi na October 2018. E indice di “Batata, yuca y batata dushi” a conoce e subida di mas grandi (4.3%) na October 2018. E indicenan di “Berdura” (2.7%), “Pisca y otro cuminda di lama” (1.8%) y Fruta (1.4%) tambe a registra subida. E indicenan di “Pan y otro productonan di grano” (-0.6%) y “Restante productonan pa alimentacion” (-0.2%) a registra caida di prijs. Den e ultimo diesdos (12) lunanan e indice di “Cuminda & servicio di catering” a subi cu 7.2%. E indice di “Cuminda na cas” a conoce un subida di 8.1%. E indice di “Batata, yuca y batata dushi” a subi cu 19.1%, e subida di mas grandi entre e gruponan di cuminda na cas. E indice di “Cuminda pafo di cas” a baha cu 0.1% na October 2018 y a registra un subida di 4.3% den e ultimo diesdos (12) lunanan. Na October 2018, “Cuminda na cas” y “Cuminda pafo di cas” como grupo, tawata tin un subida di prijs di 0.4% compara cu September 2018 y hunto tawata tin un influencia di 0.08 ppt riba e CPI, mientras cu e restante bienes y servicio hunto a experencia un caida di prijs di 0.2% y tawata tin un efecto di -0.17 ppt riba e CPI.