CBS: Indice di prijs di consumo Januari 2019

E CPI pa luna di Januari 2019 ta 122.49, loke ta representa un caida di 0.4% compara cu e indice di December 2018 (123.01).
E cambio di e CPI pa e ultimo diesdos (12) lunanan (Januari 2018 te cu Januari 2019) ta 3.9%, un subida di 2.8 ppt compara cu e periodo corespondiente di aña pasa (1.1%).
E promedio anual di e tasa di inflacion pa e periodo di Januari 2018 te cu Januari 2019 ta 3.8%, un subida di 4.2 ppt compara cu e -0.4% registra den e periodo di Januari 2017 te cu Januari 2018.
Durante e luna aki, cuatro (4) di e diesdos (12) sectornan a registra caida di prijs. E caidanan cu tabata tin e mayor efecto riba e CPI a wordo registra pa e sectornan di “Transporte” (-2.8%) y “Recreacion y cultura” (-2.9%), causando un efecto di -0.51 y 0.25 ppt, respectivamente. E caidanan den e restante sectornan a contribui cu un efecto di -0.06 ppt riba e CPI di Januari 2019.
E caidanan aki a wordo contraresta parcialmente door di principalmente subida den e indicenan di e sectornan di “Cuminda y bebida no- alcoholico” (1.8%) y “Restaurant y hotel” (1.0%), cu a contribui cu un efecto di 0.27 y 0.05 riba e CPI di Januari 2019. E subida den e sectornan restante a contribui cu un efecto di 0.07 ppt riba e CPI di Januari 2019.
E caida den e sector di “Transporte” a wordo causa door di caida den e categorianan “Gasto relaciona cu uso di vehiculo di transporte personal” (-3.6%) y “Servicio di transporte” (-13.9%), causando un efecto di -0.32 y -0.18 ppt, respectivamente. E caida den e sector di “Recreacion y cultura” a wordo causa door di un caida di 34.1% den e categoria “Vacacion”, causando un efecto di -0.26 ppt.
E subida den e sector di “Cuminda y bebida no-alcoholico” a wordo causa principalmente door di un subida den e categoria “Cuminda” (1.8%), causando un efecto di 0.24 ppt. E subida den e sector di “Restaurant y hotel” a wordo causa principalmente door di un subida di 1.1% den e categoria “Cuminda pafo di cas”, causando un efecto di 0.05 ppt.
E canasta di consumo di e CPI ta consisti di 452 bienes y servicionan. Compara cu December 2018, 46.7% di e bienes y servicionan aki a conoce un aumento di prijs causando un efecto di 0.53 ppt, mientras cu 17.0% ta mustra un caida di prijs, cu a contribui cu un efecto di -0.95 ppt y pa e restante 36.3% no tawata tin cambio den prijs. Prijsnan di bienes a baha cu 0.1% na Januari 2019 y a causa un efecto di -0.05 ppt riba e CPI di Januari 2019. Prijsnan di servicionan a conoce un caida di 1.0% y a causa un efecto di -0.37 ppt.
E CPIC (core inflation) – CPI excluyendo e efecto di energia y cuminda – a registra na Januari 2019 un subida di 2.8%, cu ta 2.5 ppt mas halto compara cu e periodo corespondiente di aña pasa (0.3%).
E indice di energia – cu ta consisti di e productonan: electricidad, awa, gasolin y diesel a registra un subida di 4.2%, cu ta 8.0 ppt mas halto compara cu e periodo corespondiente di aña pasa (-3.8%). E indice di cuminda a registra un subida di 8.9%, cu ta 8.1 ppt mas halto compara cu e periodo corespondiente di aña pasa (0.8%).
E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Januari 2019 ta Afl. 4,614, mientras cu pa un hogar di un (1) adulto e suma ta Afl. 2,197.

Comments

comments