Kralendijk Boneiro: Balor di produkto interno brutu (pib)a oumentá na 2014 na dos di e tres islanan di Hulanda Karibense.
Na Boneiru e oumento tabata 4,1 porshento i na Saba 1,8 porshento. Ta na Sint Eustatius balor di pib tabata ménos ku na 2013, esta -4.4 porshento. Asina Ofisina di Statistik (CBS) ta informá.
Si koregí e desaroyonan akí ku kambio di preis, esaki ta kondusí na kambio di volúmen di pib. Pa Boneiru, Sint Eustatius i Saba e sifranan akí ta respektivamente +1,6 porshento, -6,8 porshento i -0,2 porshento. Pa korekshon di preis a hasi uzo di índise di kosto di bida di konsumo di kasnan.
E balor di produkto interno brutu na 2014 pa Boneiru, Sint Eustatius i Saba ta respektivamente 403, 100 i 46 mion di dòler merikano (USD). Pa kabes di poblashon esei ta resultá den susesivamente 21.600, 25.300 i 25.100 dòler.
Kresementu di poblashon
Grandura promedio di poblashon na Boneiru tabata na 2013 17.911 i na 2014 18.659. Ku esaki kresementu di poblashon di Boneiru tabata mas o ménos mes grandi ku kresementu di produkto interno brutu di moda ku balor di pib pa kabes di poblashon tabata práktikamente meskos ku esun na 2013. Na Sint Eustatius grandura di poblashon tabata na ámbos aña mas o ménos igual (3.959 habitante na 2013 kontra 3.949 na 2014.) dor di kua produkto interno brutu pa kada hende di poblashon a baha ku 4,2 porshento.
Na Saba e poblashon a baha (di 1.919 pa 1.829 habitante). Pa bo motibu di esaki tambe balor di produkto interno brutu a oumentá pa kabes di poblashon ku 6,8 porshento.