E sentimento di consumidor a deteriora den e prome trimester di 2019, segun e ultimo resultadonan di e Encuesta di Confiansa di Consumidor (CCS) 2 di Banco Central di Aruba. E Indice di Confiansa di Consumidor a cay te na 95,8, for di 97,0 e trimester anterior, indicando sentimentonan relativamente pesimistico (Grafiek 1).
E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo na Aruba. Entre 100 y 110, e indice ta mustra un situacion di optimismo den pensamento di consumidornan.
E Indice di e Situacion Actual a empeora den e prome trimester di 2019, bahando cu 1,4 punto di indice na 94,6. E indice di situacion personal financiero actual a bira pesimista den e prome trimester di 2019, esta di 102,5 pa 97,5. Tur e otro componentenan di e Indice di e Situacion Actual ta mas negativo, cu excepcion di e situacion financiero actual di gobierno, cu a subi cu 3,3 punto di indice na 96,7.
E Indice di Expectativanan a deteriora den e trimester bou di revision, bahando cu 0,5 punto di indice te na 97,3. Consumidornan tabatin expectativanan menos positivo ariba nan situacion personal financiero, como cu e indice aki a baha, di 104,4 pa 101,2 (31,3% di respondientenan a indica cu nan situacion financiero lo ta miho den e siguiente 6 luna). Respondientenan tabata ainda pesimista riba e otro componentenan di e Indice di Expectativa.
E indice di Habito di Consumo ta esun cu a baha mas durante e prome trimester di 2019, cu 1,8 punto di indice te na 96,7. Tur componentenan di e indice di e Habito di Consumo a baha, pero consumidornan tabata neutral pa compra di aparato grandi y positivo pa bay cu vakantie. E gran mayoria di respondientenan (86,7%) ta anticipa cu prijsnan lo subi den e siguiente 6 luna, resultando den un Indice di Expectativa di Prijs di 90,5.
Resumiendo, e deterioracion den e confiansa di consumidor ta atribui na bahadanan den virtualmente tur componente.
