COPA AVA 2017 a conoce e aña aki dos otro Teamnan Campeon den e categoria di Open Class. Den e clase di Damas Senior Centro di Bario Noord a titula Campeon y den e Cabayeros Senior VENUM a conquista e Copa pa aña 2017.
Riba Cancha deportivo di Centro Deportivo Betico Croes, den un wega cu yen di tension, e Team di Damas di Centro di Bario Noord cu Coach Noralfa Eckmeyer a logra gana 2 – 1 for di e Team hoben Tornado di SV Britannia cu Coach Jude Pietersz, kende a reemplasa sra. Cheddy Lopez Henriquez. Un wega cu a bay casi maximo den tur e setnan y sigur e dos Teamnan aki lo sigui bataya cu otro den e proximo Campeonato Nacional di Volleyball.
Lider di Campeonato Medelin Sapuana a haci entrega di e Copa Campeon hunto cu Presidente di Volleyball Association sra. Filomena Curiel.
Sub Campeonnan Tornado SV Britannia tambe a ricibi nan Copa y nan medayanan.
Y e ultimo wega pa e COPA AVA 2017 a bay entre e Cabayeronan di LA FAMA Spartans y VENUM, den cual wega ambos Team a bataya pa e titulo y finalmente VENUM a vence cu e score di 2-0. VENUM cu su Coach Errol Yrausquin a bira e Campeonnan nobo di COPA AVA mientras cu LA FAMA Spartans cu Coach Elmerlindo Robles de Medina a keda na di dos luga.
E COPA Campeon ta wordo entrega na VENUM door di Lider di Campeonato Medelin Sapuana den presencia di Presidente di Aruba Volleyball Association sra. Filomena Curiel.
Directiva di Aruba Volleyball Association ta gradici tur Organisacion, Atletanan, Lider di Campeonato Medelin Sapuana y muy especial e Referee-nan sr. Octavio Woodley y sr. Richard Werleman pa nan dedicacion, aporte y participacion pa a logra haci COPA AVA 2017 un biaha mas exitoso! Masha Danki.