PARIS, Francia – E minister di Interior Frances, Bernard Cazeneuve, a wordo nombra como prome minister, Palais de l’Élysée a laga sa diamars.
Cazeneuve lo substitui Manuel Valls, kende a anuncia dialuna su renuncia pa asina lansa su mes pa e candidatura presidencial. Valls lo competi den e primarianan pa e candidatura di e Partido Socialista den e eleccionnan di otro aña, despues cu e presidente François Hollande no a pone su mes reeligibel.
Como minister di Interior, Cazeneuve tabata responsabel di e forsanan di siguridad di e nacion, mientras cu un serie di atake terorista a golpia e pais, incluyendo e atakenan di Paris di aña pasa caminda cu a muri 130 persona.
Valls, kende tambe a sirbi previamente como minister di Interior, a bisa dialuna cu kier un Francia independiente “inflexibel den su balornan, ora cu e ta enfrenta China di Xi Jinping, Rusia di Putin, Merca di Donald Trump, Turkia di Erdogan”, na referencia di e lidernan di e paisnan aki.
Si Valls gana e candidatura socialista, e lo enfrenta François Fillon di e partido Republicano y Marine le Pen di e ultraderechista, Frente Nacional den e prome buelta di e eleccionnan presidencial, cu lo tuma luga den primavera proximo.
E renuncia di Valls a duna un paso na un reorganisacion di e gabinete, cu e Parlamentario Socialista Bruno Le Roux nomina na minister di interior, pa ocupa e luga di Cazeneuve.
Fuente: CNN en Español