Training den Caya Betico Croes sigur ta algo cu mester sigui haci pa e personal di Cuerpo di Bombero en general. Esaki ta pa nan ta bon prepara den caso di un candela, segun Sr. Ferdinand Ponson di Cuerpo di Bombero ta splica.
Cuerpo di Bombero tin diferente plannan traha pa haci un atake den Caya Betico Croes y nan a pone paar di tubo bou di vloer, a pone hydrantnan, pero Cuerpo di Bombero semper ta busca un Plan B, pa si algo bay fout con e bomberonan por haci. Esaki ta parti di e trainingnan cu Cuerpo di Bombero ta bezig cune. A haci un simulacro di candela, pa wak con e bomberonan ta traha y pa wak tambe con e inzet ta pa loke ta di e personal di bombero.
Den caya grandi tin tambe hydrantnan cu ta otro di locual nos ta custumbra cun’e, y te unda cu a testnan, esaki a bay bon. Durante e training a haci uzo di e hydrantnan cu tin den e buitenkring di Caya y bomberonan a uza nan mesun slang. Bomberonan a yega di haci trainingnan cu e slangnan cu tin bou di tera den Caya, y nan tabata den bon condicion.
Sr. Ferdinand Ponson di Cuerpo di Bombero ta haci un apelacion na e comunidad, pa por favor no blokia un hydrant. Esaki ta stroba e trabao di Cuerpo di Bombero, y tardansa ta haci cu ta tuma seconde y minuutnan innecesario cu ta pone cu e candela ta bira mas grandi.