Recientemente a firma pa trabounan cu ta bay tuma luga pa loke ta Paradera Corridor, BIC ta e compania cu lo inicia e aña aki ainda cu e trabounan. Banda di esaki a anuncia cu lo brinda homenahe na dos persona cu a/ta aporta grandemente na cultura y historia di Aruba, esta Harry Bareño y Alfonso “Buchi” Boekhoudt.
Mas o menos 6 aña pasa a cuminsa papia di e intencion pa crea na Paradera un corridor en conexion cu nos turismo. Motibo e tempo ey tabata pasobra den Paradera tin Casibari, Ayo Rock Formation entre otro, rutanan cu ta bay Sero Cristal y diferente otro atraccion turistico. Mester menciona cu Gobierno di Aruba (Gabinete Mike Eman 1 e tempo ey) a mira e importancia pa embeyecemento cuminsa tuma luga den e area aki. Mescos cu ta mira ta tuma luga den practicamente tur bario di Aruba.
Anthony Thiel di BIC ta esun cu a haya e derecho pa por haci loke ta yama e tercer fase aki cual trabou ta cuminsa e aña aki y ta continua cu e di 2 fase di fase 3 te na e entrada di Santa Rosa, unda cu e bario di Piedra Plat ta termina.
Nombracion di cayanan
‘Banda di e proyecto aki, e momento ta hopi special pasobra den Conseho di Minister a tuma un decision, cual mi a pidi un copia di dje pa por anuncia e decreto aki. E decision tuma pa Gabinete Mike Eman 2 ta e peticion pa nombra e caya di Rotonde di Paradera te na e proyecto aki. Unabes cu esaki termina lo carga e nomber Caya Alfonso “Buchi” Boekhoudt’. Sr. Boekhoudt tabata presente hunto cu famianan y tabata un momento hopi emocional p’e.
Sr. Boekhoudt ta un persona cu a contribui masha hopi na nos cultura, un persona cu ta claba Cah’i Orgel, traha cilinder di cahanan di orgel y un persona cu tabata un di e pioneronan na momento cu steel pan a wordo introduci na Aruba. “E respet di mas grandi cu ami como minister di cultura tin como yiu di Paradera, ta e hecho cu Buchi ta dedica hopi di su tempo na traspasa e cultura y conocemento cu e tin di Cah’i Orgel y loke e ta significa pa nos aki na Aruba.
Den e mesun conseho di minister aki a tuma decision cu for di e rotonde (Bright Bakery) te cu e rotonde di Santa Crus, e caya lo carga e nomber Caya Harry Bareño, como un bon yiu di tera cu ta sosega na paz, Minister Oduber a bisa. Un persona cu a contribui masha hopi na comercio, desaroyo di e bario y specificamente Piedra Plat y Paradera den su totalidad. Ya for di añanan 49 Bright Bakery panaderia a wordo funda y mescos cu Buchi, Harry Bareño tambe a inculca e mesun amor den su bario y e negoshi cu el a lanta den un di su yiu hombernan y famia cu a continua cu e trabounan.
E trabounan no por a wordo realisa sin sosten di colega encarga cu Infrastructa Minister Benny Sevinger y Prome Minister Mike Eman.