Diabierna 6 di Juli 2018 alarma a wordo bati alrededor di 2’or di merdia pa un candela feroz na Parkietenbos. Mesora ekipo di Serlimar S G a acesora e situacion y a bin determina cu e seccion di taira tabata na candela. Mesora a yama brandweer pa asistencia. E candela aki tabata uno cu no tabata planifica ni autorisa pa maneho di Parkietenbos. Echo ta cu e tairanan no por a pega candela riba nan mes, como tal indicando cu e incendio aki a wordo causa pa un of mas persona no autorisa.
E candela a ocasiona conmocion den vecindario, a causa di e cantidad grandi di huma preto cu a proveni di e tairanan, algo cu tabata bisto for di diferente punto riba nos isla. E situacion tambe a expone trahadonan den Parkietenbos den peliger. Ekipo di Serlimar S G conhuntamente cu ekipo di brandweer y Bureau City Inspector a purba di controla e candela pa asina e no yega otro areanan di Parkietenbos. Despues di mas of menos 4 ora di accion e candela a wordo conteni y por a mira cu banda di 7’or di anochi ainda tabata tin poco huma preto visibel ariba Parkietenbos indicando cu e candela tabata bou control.
Despues di 60 aña di existencia, Parkietenbos actualmente ta den un proceso di wordo remedia y esaki ta nifica cu tur desperdicio cu ta wordo deposita ta wordo separa y dividi den seccion, pa evita desperdicio combina cu ta contamina y ta acumula gas, cu por aumenta e chens di ocaciona candela espontaneo. Pa e motibo aki maneho di Parkietenbos ta sigur cu e candela na e seccion di deposita taira dia 6 di juli, no por a sende espontaneamente y ta trata di un incendio no autorisa.
Serlimar S G ta trahando duro pa continua cu e proceso pa remedia Parkietenbos y ta traha structura pa preveni tur tipo di situacion cu por pone trahadonan, vecindario y medio ambiente na peliger. Serlimar ta orguyoso di su ekipo cu a traha conhuntamente cu ekipo di brandweer y BCI y a zorg pa e situacion keda bou di control y a maneha esaki exitosamente. Serlimar S G ta keda pendiente di e investigacion andando pa asina identifica e causa y/of responsabel di e situacion lamentabel aki y ta spera cu esaki no bolbe sosode.