Aruba Tourism Authority (A.T.A.) tabata anfitrion di e ceramento di CATA 2017, un di Aruba su conferencianan turistico anual di mas importante. Den compas cu A.T.A. su strategia di diversificacion y enfoke riba autenticidad di producto Aruba, operadornan di Latino America a wordo duna un bonbini durante e apertura oficial cu a tuma luga na RIU Palace Aruba. Operadornan di Latino America por a experiencia un tiki di nos cultura, arte y historia Arubiano durante e evento cultural na San Nicolas; El Tableau Vivant; La Historia de Aruba, cu a wordo organisa pa A.T.A., Aruba Art Fair y Departamento di Cultura Aruba. Tambe durante nan estadia na Aruba e grupo aki por a disfruta di e celebracion unico di Dia di Rey cu un exploracion di nos isla durante e proyecto indica: ‘Conocimiento de los productos Nichos en Aruba’, cu a wordo organisa pa A.T.A. y a finalisa e dia aki cu un celebracion ameno cu a tuma luga na Tamarijn Aruba All Inclusive Resort y Divi Dutch Village. Durante nan ultimo anochi nan a celebra e clausura di e conferencia di CATA 2017 na e impresionante Linear Park pa presencia un Food Truck Festival dedica specialmente pa nan. Replicando e Food Truck Festival di dia 28 y 29 di April recien, e anochi aki tabata magico, casual y inolvidabel. E clausura perfecto pa un evento exitoso y fructifero pa Aruba su turismo.
Durante e ultimo anochi di e conferencia por a nota e operadornan Latino Americano, tabata den un bon estado di animo, motiva y inspira pa sigui respalda e producto Aruba. Pa 3 dia largo A.T.A. a haya e oportunidad y bentaha unico di por mustra e partnernan strategico tur avance y inovacion andando pa cu e producto Aruba cu aña tras aña ta den evolucion continuo. Cu un tema di felicidad y un enfasis riba e escencia di e spirito di autenticidad y custumbernan di nos mesun hendenan local, operadornan Latino Americano a conoce nos isla den angulo mas intimo, organico y puro. Algo cu a wordo bon ricibi, mirando cu e evolucion di e mercado afluente Latino Americano ta birando mas exigente pa cu autenticidad den destinonan turistico.
OPORTUNIDAD Y RETONAN DI MERCADO LATINO AMERICANO
Apesar di retonan cu e region Caribense a conoce den e ultimo aña y caida di mercado turistico di Venezuela y Brazil, Aruba a conoce crecemento significante den otro mercadonan Latino Americano. E impacto di crisis pa cu e mercado Venezolano riba nos turismo den 2016, a wordo parcialmente absorbi danki na e crecemento di Colombia cu a subi cu 39.7%, sigui pa Argentina cu un crecemento di 21.4%. Den 2016, nos isla a ricibi un total di 302,009 bishitante cu ta procedente for di Latino America, cual ta representa 27.4% di nos turismo. Den prome kwartaal di 2017 a bolbe nota un crecemento stabil di mercadonan Latino Americano manera Colombia y Argentina.
STRATEGIA DIVERSIFICA PA CAPTURA DIFERENTE GENERACIONNAN
Durante e conferencia di CATA 2017, A.T.A. a presenta su strategia nobo pa captura e atencion di e diferente generacionnan di biaheronan cu un campaña nobo titula #necesitasaruba. E campaña aki ta wordo crea a base di estudionan di mercado di mas di 11 paisnan Latino Americo y nan patronchi di consumo den e mercado di biahe. E strategia aki a wordo diseña pa presenta Aruba como e solucion y escape di nan retonan diario den un forma comico y facil pa compronde. Esaki lo wordo publica y ehecuta pa medio di mercadeo digital y tradicional den Latino America.
E relacion solido y pro-activo cu Aruba Tourism Authority y agencianan di publicidad global tin directamente cu operadornan turistico Latino Americano, ta uno clave. Durante reciente añanan e industria di biahe a transforma danki na e segmento di ‘millenials’ cu tin un patronchi di consumo diferente cu e ‘Generation X-ers’ y ‘Baby Boomers’. Facilitacion di contenido y material publicitario den forma strategico y eficiente ta un di e prioridadnan di A.T.A. Pero como un DMMO (destination marketing & management organization) mester pone atencion tambe riba e oferta di Aruba, es decir, e desaroyo di e producto Aruba considerando e segmento di ‘millenials’ creciente su exigencianan y tambe tendencianan nobo den mundo di biahe.
E conferencia CATA 2017 a logra su meta di demostra e inovacion di producto Aruba y alabes conecta e operadornan cu e esencia di nos isla, su hendenan y rikesanan di nos cultura y custumbernan. Un danki imensamente grandi ta bay na e esfuersonan di parti di Aruba Airport Authority y AHATA cu nan aporte y dedicacion a conduci na un conferencia sumamente exitoso. E resultado ta sumamente satisfactorio pa Aruba Tourism Authority cu ta mira e importancia di keda evoluciona esfuersonan di mercadeo conhuntamente cu e relacionan solido cu partnernan strategico local y internacional.