Patrick van der Biezen, fiscal na Ministerio Publico, ta splica cu Ministerio Publico den casonan penal general, no specificamente so riba casonan di abuso sexual, ta duna guia den e proceso penal. Den casonan di abuso sexual por ehempel, e momento cu un famia of mayor no kier duna denuncia na JZP – cual ta e instancia encarga cu esaki – nan por semper haci nan denuncia na ministerio publico.
“Nos ta zorg pa laga investiga cierto puntonan cu nos ta wak cu por ehempel recherche no a investiga suficiente, nos por duna instruccionnan pa nan haci esey”, segun sr. van der Biezen. E ta sigui splica cu ta duna espacio pa laga scucha testigonan, haci investigacionnan forensico y mas pa e investigacion general pa asina por bay cu un bon producto den corte pa yega na un miho resultado cu ta posibel.
Ta hopi dificil pa bisa cuanto e castigo ta maximo pasobra ta depende na diferente factornan segun sr. van der Biezen. Un di nan ta e edad di e mucha, tin articulonan cu ta aplicabel na cierto casonan dependiendo na e edad di e mucha, si e ta famia of yiu di e sospechoso esaki tambe ta hunga un rol, e por varia entre 15 pa 20 aña segun fiscal. Por ehempel den caso di rape, si un mayor ta rape su yiu, castigo maximo ta 20 aña dus ta depende e circumstancia di e caso.
Pa loke ta trata e tipo di abusonan, nos conoce abuso fisico en particular cu ta castigabel, por ehempel abuso verbal no ta castigabel ainda, pero negligencia of no cuida bo yiu si ta castigabel.